Критиките на Бајден уследија откако во петокот Твитер, сега под раководство на милијардерот, објави дека отпушта илјадници вработени во компанијата, заради намалување на трошоците
Претседателот на Соединетите Американски Држави, Џо Бајден, го обвини Илон Маск дека купил платформа за социјални медиуми (Твитер н.з.) која „шири лаги низ целиот свет“, пренесува „Си-ен-ен“.
„Илон Маск излегува и купува платформа што фрла лаги низ целиот свет“,
рече американскиот претседател на настан за собирање на средства за Демократите во Роусмонд, Илиноис.
Во критиките упатени до Маск додал дека во Америка веќе нема уредници.
Критиките на Бајден уследија откако во петокот Твитер, сега под раководство на милијардерот, објави дека отпушта илјадници вработени во компанијата, заради намалување на трошоците.
Ваквиот потег, како што наведува „Си-ен-ен”, може да го наруши начинот на кој работи една од највлијателните светски платформи, една недела откако беше купена од Маск.
Преземањето на платформата брзо беше проследено со извештаи за пораст на расистички коментари и говор на омраза на платформата, а неколку големи огласувачи ги „замрзнаа“ кампањите на Твитер во последните денови.
Прес-секретрарот на Белата куќа, Карин Жан – Пјер, претходно во петокот за медиумите изјави дека Бајден „е посветен околу важноста платформите на социјалните медиуми да продолжат да преземаат чекори за намалување на говорот на омраза и дезинформациите“.
„Тоа уверување се однесува и на Твитер, на Фејсбук и на сите други платформи за социјални медиуми каде што корисниците можат да шират дезинформации“,
додаде таа.
Маск во петокот „твитна“ дека Твитер забележал „голем пад на приходите“, за што ги обвини „активистичките групи кои вршат притисок врз огласувачите“, а подоцна се осврна на отпуштањата со објава дека „за жал, нема избор кога компанијата губи над 4 милиони долари на ден“.
Тој напиша дека на вработените во заминување им била понудена тримесечна отпремнина.