Бајден бил информиран за настаните во Израел, на Нетанјаху му рекол дека САД го поддржуваат правото на самоодбрана

Бајден му рекол на израелскиот премиер Бенјамин Нетанјаху дека неговата земја е подготвена да ги понуди сите соодветни средства за поддршка откако палестинската исламистичка група Хамас започна напад врз Израел

Американскиот претседател Џо Бајден денеска бил информиран за „ужасните терористички напади на Хамас во Израел“, се вели во соопштението на Белата куќа.

„Високи претставници на националната безбедност утрово го информираа претседателот Бајден за ужасните терористички напади на Хамас во Израел. Бајден ќе остане во близок контакт со израелските партнери за ситуацијата“,

се вели во соопштението.

Бајден му рекол на израелскиот премиер Бенјамин Нетанјаху дека неговата земја е подготвена да ги понуди „сите соодветни средства за поддршка“ откако палестинската исламистичка група Хамас започна напад врз Израел.

„Јасно му кажав на премиерот Нетанјаху дека сме подготвени да ги понудиме сите соодветни средства за поддршка на владата и народот на Израел. Израел има право да се брани себеси и својот народ“,

рекол Бајден.

Реакции и осуди од ЕУ, ОН и НАТО по нападите на Хамас врз Израел

Од канцеларијата на израелскиот премиер Бенјамин Нетанјаху информираа дека денеска тој телефонски разговарал со американскиот претседател Џо Бајден.

„Американскиот претседател Џо Бајден му се јави на премиерот Бенјамин Нетанјаху и истакна дека САД стојат покрај Израел и целосно го поддржуваат правото на Израел на самоодбрана“,

напиша канцеларијата на Нетанјаху на социјалната мрежа „Икс“.

Нетанјаху најави одмазда за нападите врз Израел и мобилизација на огромен број воени резервисти

Оттаму додаваат дека премиерот Нетанјаху му се заблагодарил на американскиот претседател Бајден за безрезервната поддршка и јасно ставил до знаење дека е неопходна силна, долготрајна кампања – во која Израел ќе победи.

Prime Minister Netanyahu thanked US President Biden for the unreserved support and made it clear that a forceful, prolonged campaign – which Israel will win – is necessary.

— Prime Minister of Israel (@IsraeliPM) October 7, 2023

И американскиот државен секретар Антони Блинкен, денеска во посебна изјава рече дека САД недвосмислено ги осудуваат ужасните напади на терористите на Хамас против Израел, вклучително и цивили и цивилни заедници.

„Ќе останеме во близок контакт со нашите израелски партнери“,

рече Блинкен.