Украинскиот претседател Володимир Зеленски ја поздрави оваа иницијатива велејќи дека Австралија останува сигурен партнер на Украина во одбраната на слободата, демократијата, човечкиот живот и глобалната безбедност
Украина ќе добие од Австралија 49 стари американски борбени тенкови „М1А1 абрамс“. Австралискиот министер за одбрана Пет Конрој ова го најави пред состанокот на НАТО во Брисел велејќи дека Австралија стои со Украина во нејзината борба против илегалната инвазија на Русија.
Шеесеттонските тенкови, создадени меѓу 1985 и 1993 година, се опремени со топ од 120 милиметри и се надградени пред да бидат купени од Канбера во средината на 2000-тите.
За австралискиот трансфер на тенковите „абрамс“ во Украина потребна е и дозвола од САД, согласно регулативите за меѓународниот сообраќај со оружје (ИТАР).
Украинскиот претседател Володимир Зеленски ја поздрави оваа иницијатива на мрежата Икс и изрази благодарност до Австралија.
„Благодарност до Австралија за најавата за суштинска одбранбена помош за Украина во вкупна вредност од 170,6 милиони американски долари. Особено сум благодарен за храбрата одлука на Австралија да обезбеди 49 тенкови ‘М1А1 абрамс‘ за нашата одбрана од руската агресија. Го цениме нашето партнерство со Австралија и нејзиниот значаен придонес за постигнување праведен и траен мир во Украина, враќање на стабилноста во Европа и заштита на меѓународниот поредок заснован на правила“,
пишува Зеленски.
Тој додава дека Австралија останува сигурен партнер на Украина во одбраната на слободата, демократијата, човечкиот живот и глобалната безбедност.
I thank @AlboMP and the people of Australia for today’s announcement of essential defence assistance for Ukraine totaling $170,6 million.
— Volodymyr Zelenskyy / Володимир Зеленський (@ZelenskyyUa) October 16, 2024
I am especially grateful for Australia’s brave decision to provide 49 M1A1 Abrams tanks for our defense against Russian aggression.
We…
Украина ја доби првата серија употребени тенкови „М1А1 абрамс“ во септември 2023 година, испорачани од САД.
Дел од оваа австралиска помош е наменета и за складирање на резервни делови.
На почетокот на годината Канбера објави дека нема да одговори на барањето на Киев за испорака на стари хеликоптери „MRH90 Тајпан“, тврдејќи дека тие веќе не се за употреба.
Најновиот австралиски пакет е вреден 245 милиони австралиски долари. Со ова, вкупната австралиска воена помош за Украина од руската инвазија во 2022 година изнесува 1,3 милијарди австралиски долари, а вкупната поддршка на 1,5 милијарди австралиски долари.
Тенкот „абрамс“ претставува едно од најмоќните копнени оружја во американскиот арсенал. Способен е да им се доближи на непријателските тенкови и други цели, да ги разнесе, а потоа побргу да се повлече. Тешкиот оклоп го штити возилото и просторот каде што се сместени војниците во него (предвиден за четиричлен екипаж) од отворен оган од мали оружја, од удари од фрагменти од гранати, а може да поминува и низ вода со длабочина од 1,2 метри.
Тенкот името го добил по генералот Крејтон Абрамс, командант на единицата за тенкови од Втората светска војна.