Според Аврамовски, се забележува еден неубав тренд на намалување на суштинската транспаретност во рамки на судството што ја забележале и на вчерашната седница на Управниот одбор на Академијата за судии и јавни обвинители (АСЈО)
Образложенијата на одлуките се она што е клучно за целиот систем и она што е практично главниот фактор кој влијае и ја креира довербата на граѓаните во судскиот систем. Загрижувачки е трендот да забележуваме отсуство на образложенија на какви било одлуки во рамки на судскиот систем, смета Дарко Аврамовски од Коалицијата „Сите за правично судење“ во однос на вчерашниот избор на нов директор на Академијата за судии и јавни обвинители (АСЈО).
Ирина Трајкоска-Стрезоски беше избрана за нова директорка на оваа институција, а изборот беше спроведен со тајно гласање, со заокружување на еден или повеќе од седумтемина кандидати на избирачките ливчиња – процедура која беше договорена по стартот на седницата, но без присуство на јавноста.
Според Аврамовски, се забележува еден неубав тренд на намалување на суштинската транспаретност во рамки на судството што ја забележале и на вчерашната седница на Управниот одбор на Академијата за судии и јавни обвинители.
„Не навлегувајќи во тоа дека статутот на Академијата налага одлуките Управниот одбор да ги носи со јавно гласање, поентата е дека во судскиот систем образложенијата на одлуките се она што е клучно за целиот систем и она што е практично главниот фактор кој влијае и ја креира довербата на граѓаните во судскиот систем. Образложението на одлуките е единствениот начин на кој може да се уверите и да измерите дали навистина е донесена најдобрата можна одлука“,
рече денеска Аврамовски одговарајќи на новинарско прашање дали имаат забелешки за вчерашната седница.
Тој смета дека одлуките мора да бидат образложени за да се убеди јавноста дека нема некои несоодветни фактори кои влијаеле на носењето на таа одлука.
„Не навлегувајќи во тоа дека гласањето мора да биде јавно, ако сакате да ја подобрите довербата на јавноста во судскиот систем и ако сакате да ја зголемите репутацијата на институциите кои ги претставувате или ги застапувате мора да ги образлагате своите одлуки и да ја убедите и јавноста и ибрзаните и неизбраните кандидати дека навистина сте ја донеле вистинската одлука и дека нема некои несоодветни фактори кои влијаеле на носењето на таа одлука. Така што е навистина загрижувачки ваквиот тренд да забележуваме отсуство на образложенија на какви било одлуки во рамки на судскиот систем“,
додаде Аврамовски.
За начинот на вчерашниот избор, кој беше со заокружување, а не со јавно одлучување и за тоа што ќе следува, Аврамовски вели дека сега ќе следува дискусија во јавноста дали навистина е направен најсоодветниот избор во рамки на Академијата.
Аврамовски вели дека одлуката може да биде оспорена пред Управниот суд, но сепак вели дека ваквиот начин на одлучување и избор кај јавноста ќе раѓа недоверба во системот.
„Секако дека може да се оспори. Одлуката може да биде оспорена пред Управниот суд. Веројатно можеби би имало и некаква законска можност затоа што беше отстапено од законскиот предвиден начин на гласање. Меѓутоа не навлегувајќи во тоа дури и да немате изречни одреби кои што налагаат дека треба да ги образложите сопствените одлуки и гласови, тоа секогаш треба да го прават, оосбено ние забележуваме дека Академијата, Судскиот совет и Советот на јавните обвинители се тие коишто не даваат образложенија на своите одлуки. Ако земете предвид дека тие се клучниот филтер и главниот извор преку којшто влегуваат судии и јавни обвинители во правосудството, ако не давате образложенија на одлуките кој и зошто е избран, тогаш ќе се соочуваме постојано со ваква ситуација каде јавноста ќе има недоверба во системот“,
додаде Аврамовски.
Вчера, со шест гласа „за“, Управниот одбор на Академијата за судии и јавни обвинители „Павел Шатев“ одлучи новиот, четиригодишен мандат, да ѝ го довери на обвинителката Ирина Трајкоска-Стрезоски од Вишото јавно обвинителство-Битола.
Еден глас помалку, односно пет гласови при денешниот избор доби судијата Ненад Савески од Основниот кривичен суд-Скопје, а трет, со три освоени гласа беше заменик-директорот на Академијата, Илир Исени.