Асоцијацијата на архитекти на Македонија (ААМ) и Академијата на архитекти, како дел од Асоцијацијата, се за доследно почитување на целите, проекциите и планските решенија од Генералниот урбанистички план на град Скопје (2012-2022) и плановите од пониско ниво мора да бидат усогласени со овој стратегиски план.
Архитектите велат дека ова се однесува и на планот во чиј состав е оваа локација спроти хотелот „Холидеј ин“, но и за сите други за кои постои интерес во јавноста, како што се фабриката Треска, Дебар Маало, Мал ринг, Езеро Треска, Расадник и други.
„Деталните урбанистички планови, кои претставуваат акти од јавен интерес, треба да содржат креативни решенија, кои на жителите, корисниците и посетителите на просторот ќе им овозможат негово безбедно, квалитетно и комфорно користење и доколку не е така истите мораат да бидат коригирани“,
велат од Асоцијацијата на архитекти.
Во изминатиот период ААМ го поддржа „мораториумот“ за градење на 33 детални урбанистички планови во Општина Центар, како единствен начин да се спречи спроведувањето на важечките планови кај кои се констатирани сериозни прекршувања и недоследности во однос на Генералниот урбанистички план и општите правила и параметри на урбанистичко планирање, додека не се донесат нови, а со цел да се загарантира и почитува едно од највисоките уставни права, а тоа е јавниот интерес.
„Напоменуваме дека ‘мораториумот’ има смисла ако е временски и содржински строго и наменски ограничен“,
велат тие.
Додаваат дека во континуитет ги следеле актуелните случувања околу мораториумот и кон средината на 2019 година на покана на Општина Центар одржале консултативни состаноци на кои било посочено дека одолговлекувањето на состојбите е контрапродуктивно. Тогаш на архитектите им било понудено активно да бидат вклучени во разрешувањето на проблемите со конкретни предлози за тоа како побрзо и поефикасно да се дејствува.
„И понатаму ААМ стои на располагање на надлежните институции за инклузивност во дејствување за оптимизирање на процесите и процедурите во насока на навремено и правилно донесување одлуки кои ќе им овозможат на архитектите легитимни услови за работа. Ние како архитекти не сме против градење, ниту против личните и бизнис-интереси на поединци, доколку тие не го загрозуваат квалитетот на животниот простор и јавното добро“,
велат од Асоцијацијата.