Градоначалничката на Скопје тврди дека Градот има „чиста“ позиција во однос на приватните превозници. Данела Арсовска, во интервју за „360 степени“, вината за сообраќајната парализа од изминатите денови ја лоцира кај „Слобода превоз“ зашто, како што рече, сите пари ЈСП ги исплаќало кон ова правно лице со кое имало склучен договор. Зошто превозниците се жалеа дека пари ни виделе, Арсовска ги упати на адреса на „Слобода превоз“. Како несериозни ги смета тврдењата на ВМРО-ДПМНЕ дека од јавниот превоз во Скопје ги истиснува „Слобода превоз“ и „Макекспрес“ за бизнисот да го преземе бугарска фирма
360 степени: Едно од прашањата што денеска ги постави ВМРО-ДПМНЕ е – зошто повикот за пријавување приватни превозници трае пет недели ако не е точно дека бугарска фирма треба да влезе во играта?
Арсовска: Затоа што сакаме да дозволиме на сите оние кои сакаат да се пријават да имаат време да се подготват и да ги соберат сите потребни документи. За 30 дена сите ќе знаат кој лаже, кој излегува на прес-конференции и кажува невистини. Сметам дека на јавноста и сега и е јасно, но, знаете, за политиканство на некои луѓе никогаш нема да им биде доволно.“
360 степени: Колку пријавени има на јавниот повик за избор на приватни превозници за линиите 20 и 22 во главниот град?
Арсовска: Тоа штотуку е објавено и си има рок, а во тој рок ќе си се пријават сите приватни превозници што во овој момент беа ставени во ситуација во која никој не требало да ги стави. Тоа беше една егзибиција на политиканство – се злоупотребува правото на протест, се злоупотребуваат тие луѓе што работат и се борат за леб… Го поддржувам правото на протест, но граѓаните не се должни да го трпат ова што се случува и сега ги гледате истите личности што ги иницираа овие протести, кои доведоа до раскинување на договорот со Град Скопје зашто прекинаа да ги извршуваат услугите повеќе од два дена… Договорот е јасен, тој се раскинува по автоматизам ако прекинат да возат повеќе од два дена.
360 Степени: Дали сето ова ќе биде доволно за да се обезбеди соодветен јавен транспорт на скопјани? Зашто веќе има поплаки за нередовни линии и преполни автобуси?
Аросвска: Скопјани немаат соодветен јавен превоз зашто некој го блокира градот. Ако некој смета дека за претпоставени доверителски односи треба да излезе и да го блокира цел град, нормално е дека ќе имаат застој во сообраќајот.
360 Степени: Должи ли и колку должи ЈСП на „Слобода превоз“ и „Макекспрес“?
Арсовска: Јас на телевизија видов луѓе што изјавија дека по неколку месеци не им е исплаќано. Граѓаните треба да знаат дека Град Скопје има договор само со едно правно лице и нему континуирано му се исплаќа, а еве ги секојдневните исплати. Е сега како, колку и дали тоа правно лице исплаќало, ние не знаеме. До 8 ноември, додека не почнаа овие протести и блокади, ЈСП редовно си исплаќаше до „Слобода превоз“. Ние знаеме колку средства се исплатени и инстуциите си имаат начин да постапат и да се види која е вистината. Оној што ја направи целата збрка реши да се повлече, да се изолира и тоа доволно кажува. Ниту еден од овие луѓе кои велат дека сакаат чесно да си го заработат лебот нема да дозволиме да остане на улица. Но, некој да манипулира, да тера политика преку нив и да се обидува да го парализира градот, тоа нема да го дозволиме, особено не со закани и со уцени.“
360 Степени: Во ваква хаотична атмосфера, реално ли е воопшто да се верува дека ќе го исполните предизборното ветување за целосно бесплатен јавен транспорт во Скопје?
Арсовска: Има многу фактори кои се во игра – тука се бројните опструкции што ги гледаме, но она што е напишано во програмата, јас веќе реков, планираме целата програма да ја реализираме. Она што не го знаевме пред 12 месеци е дека ќе се соочиме со ваква тешка енергетска криза, а ние притоа имаме загубар на кој му се повлечени голем дел од средствата кои досега биле дотирани од Владата за превозот на студентите, повлечени се дел од средствата за ова претпријатие да биде одржливо и сега во овој момент се бориме со криза да го консолидираме ова јавно претпријатие. Кога ќе се надмине кризата, ќе се реализира се она што е ветено.
360 Степени: Ветивте, но досега не видовме ништо ниту од набавката на нови 250 еколошки автобуси?
Арсовска: Минатата година, кога ја презедов функцијата, веќе имавме изготвен буџет во кој не можевме да вметнеме нешто што би можеле да го реализираме. Оваа година, а се надевам и апелирам на конструктивност од советниците, за да го исполниме сето она што е ветено до граѓаните. Она што сакаме е да се почне со реализација на тоа што е ветено на граѓаните, а тоа е да почнеме со еколошки автобуси – се оди на етапи зашто е потребна неопходна инфраструктура.
360 Степени: Колку вакви автобуси треба да дојдат во 2023 г.?
Арсовска: Имаме повеќе проекти кои течат, а во еден од нив имаме добиено одредени средства кои ќе се предвидат за еко-автобуси. Она што ние, како Град Скопје, би сакале да го реализираме е да имаме барем 50 нови еко автобуси.
360 Степени: Кога бевте „во добрите“ со Мицкоски тој најавуваше набавка на еколошки автобуси преку грантови?
Арсовска: Прашајте го Мицкоски. Не видовме никакви грантови или проект.
*Повеќе вести од вечерашното интервју на Арсовска за „360 степени“: