Градоначалничката Данела Арсовска рече дека годинава Скопје се кити со 30 000 евра, односно за драстично пониска сума од она што досега се трошело на украсување на градот
Поранешниот градоначалник на градот Скопје, Петре Шилегов се огласи на социјалните мрежи и објави фотографија од предновогодишно Скопје за време на неговиот мандат. Го спореди со украсен Лондот за време на Новогодишните празници
Градот Скопје и оваа година ќе биде украсен, но за драстично пониска сума од она што досега секоја година се трошело на украсување на градот преку сомнителни набавки, напиша попладнево на својот Фејсбук профил, градоначалничката на Скопје, Данела Арсовска, на реакциите на социјалните мрежи дека главниот град не е украсен во пресрет на Новогодишните празници.
„Не ја разбирам потребата, веројатно во недостаток на останати аргументи и оваа година во истиот период како на тајмер, партиските војници да констатираат дека „Скопје е тажно“ и дека „Скопје нема да се накити“ за време на Новогодишните празници. Секоја година истите луѓе се демантирани. Не од нас, туку од граѓаните кои се фотографираат со Новогодишните украси во градот. За загрижените да информираме дека Градот Скопје и оваа година ќе биде украсен, но за драстично пониска сума од она што досега секоја година се трошело на украсување на градот преку сомнителни набавки“,
напиша Арсовска.
Како што вели таа, некој треба да одговори како трошел по фирмички за китење годишно помеѓу 90 000 и 245 000 евра за украсување, пари на граѓаните кои завршувале во приватни џебови.
„Украсувањето е започнато, а како и секоја година, главниот град ќе блесне со Новогодишна магија на 15-ти декември“,
вели Арсовска.
Посочи дека сега градот се кити за 30 000 евра.
„Минатата година, во време на најголемата глобална економска и енергетска криза, градот беше накитен без дополнителни трошоци, а средствата предвидени за китење, но и трошоците кои порано се правеле за ручеци и пиење по кафани, беа наменети за ранливите категории на граѓани“,
додаде таа.
И поранешниот градоначалник на Скопје, Петре Пилегов денеска на Фејсбук напиша краток коментар околу украсувањето за Нова година на главниот град.
Даде споредба како Скопје изгледало за прославата на 2020 година, во време кога тој бил градоначалник.
„Ретко ги коментирам состојбите во Скопје, иако многу често и тоа како имам што да кажам. Но, после повеќе од 1 000 примени пораки, едноставно, морам да прокоментирам. На фотографијава е Скопје 2019/20. Споредено со Лондон. Темнината што сега не опкружува, на свој начин, сепак е наш, личен избор ….П.С. За прославите и Винтерленд во некоја друга прилика“,
напиша Шилегов.