Таа денеска заедно со лидерот на ДУИ, Али Ахмети, градоначалникот на Сарај, Блерим Беџети и дел од врвот на ДУИ присуствуваше на свеченост за изградба на водовод за седум села од таа општина, ветување кое, како што нагласи, жителите го слушале 30 години, но сега со средства од Град Скопје чиста вода за пиење ќе добијат идната година
Најавувам дека од следниот буџет, веќе го буџетираме бесплатниот јавен превоз за сите граѓани. Ќе биде ставена и оваа одлука пред советниците кога ќе гласаат за буџетот во 2024 година, порача денеска градоначалничката на Град Скопје, Данела Арсовска, по промоцијата на проектот „Подобрување на водоснабдувањето за населените места Рашче, Копаница, Бојане, Буковиќ, Ласкарце, Чајлане и Семениште“.
Апелираше во интерес на граѓаните советниците да ја изгласаат и одлуката со која требало да почнат сукцесивно да се набавуваат 250 екоавтобуси.
„За реализација на овој проект веќе десетина пати пред советниците беше доставена одлуката, со која требаше овие 250 автобуси да почнат сукцесивно да се набавуваат. Меѓутоа, за жал, кај нив свесноста не е на тоа ниво да можат да разберат дека за нашите граѓани е неопходно да имаат јавен превоз кој што ќе стигне до секоја можна локација, до секое населено место, сите да можат децата да си ги испратат на училиште и да стигнат до своите работни места навремено. Ова е нешто што треба да го направат во интерес на електоратот и на сите оние кои што ги избрале на изборите“,
изјави Арсовска.
Според неа, ова е нешто што не би требало да има политичка заднина.
Воведувањето на бесплатен јавен превоз беше едно од нејзините главни ветувања во изборната кампања поддржана од ВМРО-ДПМНЕ.
Сепак, таа неколкупати има посочено дека тоа е директно поврзан со набавката на нови автобуси, за кои таа не доби поддршка од членовите на Советот.
Вториот услов, нагласува таа, е што за тоа понатаму ќе треба да гласаат и советниците, како и да дадат зелено светло за дотации за ЈСП од градскиот буџет за да може ова јавно претпријатие да генерира пари и да опстои.
Таа денеска заедно со лидерот на ДУИ, Али Ахмети, градоначалникот на Сарај, Блерим Беџети и дел од врвот на ДУИ присуствуваше на свеченост, изградба на водовод за седум села од таа општина, ветување, кое како што нагласи, жителите го слушале 30 години, но сега со средства од Град Скопје чиста вода за пиење ќе добијат идната година.
Градоначалникот на Сарај, Блерим Беџети, се заблагодари за соработката со Арсовска нагласувајќи дека на првата работна средба со градоначалничката таа ја отворила темата за водоводот. Беџети рече дека на Арсовска тогаш ѝ рекол дека се работи за скап проект, но таа, како што нагласи, му одговорила дека не го прашала за цената, туку дека тој проект мора да се сработи во интерес на граѓаните.
Лидерот на ДУИ, Ахмети, во обраќањето нагласи дека многу проекти можат да се реализираат доколку постои соработка меѓу политичките фактори, нагласувајќи дека потврда за тоа е соработката меѓу Сарај и Град Скопје.
Арсовска во обраќањето им се заблагодари на локалната власт од Сарај на довербата.