Армијата може да ја позајми теренската монтажна болница со која располага, ако Министерството за здравство има потреба од неа во справувањето со коронавирусот, најави министерката за одбрана Радмила Шекеринска.
Според нејзиниот одговор, таа веројатно би била монтирана на просторот кој се расчистува околу Клиниката за инфективни болести.
„Во моментов се расчистува просторот околу Инфективната клиника и со Министерството за здравство ја разгледуваме можноста да ја понудиме како дополнителен ресурс во здравството т.н. полска болница, тоа не е болница од Полска туку болница за теренски услови. И тоа е исто така дел од опремата која ја имаме добиено како поранешна земја партнер на НАТО и сегашна земја членка“,
рече Шекеринска посочувајќи пример за придобивките од Алијансата.
Таа како пример ја посочи и донацијата на скафандери од САД како поддршка за нашето членство во НАТО.
„Опрема која денеска ја користиме за справување со епидемијата. Се сеќавам дека многу ни се подбиваа зошто ни се скафандери зошто ни е заштита, зошто ги презентираме“,
рече министерката.