Скопскиот Апелациски суд преку писмено соопштение, објавено денеска на својата официјална интеренет-страница, информира дека жалбата на обвинетиот Ѓоргиевски е одбиена како неоснована, додека оние на останатите двајца обвинети се делумно уважени, но само во однос на досудениот износ на име на нематеријална штета која тројцата се задолжени солидарно да ја исплатат на семејството на убиениот ракометар, односно на неговите родители и брат, поединечно. Надоместот на штета, што со пресудата на Апелација обвинетите треба да го исплатат на семејството на убиениот хрватски ракометар, е повеќе од двојно помал во однос на сумите што претходно ги досуди Основниот кривичен суд Скопје
Анџело Ѓоргиевски, Клементина Левковска и Андреј Костовски ќе ги издржуваат високите затворски казни што со првостепената пресуда им ги одреди Основниот кривичен суд Скопје за убиството на хрватскиот ракометар Денис Тот, пресуди Апелацискиот суд Скопје.
Пресудата на второстепениот суд, со која првостепените казни затвор за тројцата обвинети стануваат правосилни, следува по разгледувањето на жалбите кои нивните бранители ги образложија на јавната седница што се одржа во Апелација кон средината на мај оваа година.
Со првостепената пресуда на Кривичен највисоки казни од 18 години затвор добија 28-годишниот Ѓоргиевски и 19-годишната Клементина Левковска, додека нејзиниот врсник Андреј Костовски доби две години помалку, односно беше осуден на 16 години затвор.
Скопскиот Апелациски суд преку писмено соопштение, објавено денеска на својата официјална интеренет-страница, информира дека жалбата на обвинетиот Ѓоргиевски е одбиена како неоснована, додека оние на останатите двајца обвинети се делумно уважени, но само во однос на досудениот износ на име на нематеријална штета која тројцата се задолжени солидарно да ја исплатат на семејството на убиениот ракометар, односно на неговите родители и брат.
„Апелацискиот суд Скопје постапувајќи по кривичниот предмет КЖ-224/23, по одржана jавна седница на 15.05.2023 година, на нејавен дел од седницата на ден 05.06.2023 година донесе пресуда со која жалбата на обвинетиот А.Ѓ. е одбиена како неоснована, додека жалбите на обвинетите А.К. и К.Л. се делумно уважени, на начин што пресудата на Основниот кривичен суд се преиначува по однос на досудениот износ на име нематеријална штета и обвинетите се задолжени, солидарно, на мајката на починатиот Денис Тот, Т.Т., да и исплатат 4 000 000 денари. Идентичен износ ќе треба да му се исплати и на И.Т., татко на починатиот, додека на Б.Т., брат на покојниот, му е досудена исплата на име нематеријална штета во висина од 3 000 000 денари. Согласно пресудата при исплатата ќе биде пресметана и законска казнена камата од денот на донесување на првостепената пресуда – 30.11.2022 година, до исплатата. Во останатиот дел првостепената пресуда по однос на изречените казни и висината на истите, со која обвинетите А.Ѓ. и К.Л. се осудени на казна затвор во траење од по 18 години, а третообвинетиот А.К. на казна затвор во траење од 16 години, се потврдува“,
се наведува во соопштението на Апелација.
Инаку, со првостепената пресуда тројцата обвинети беа задолжени да платат надомест на штета на семејството на убиениот ракометар по девет милиони денари (околу 145 000 евра) за мајката и таткото, и 8 милиони денари (околу 130 000 евра) за братот на Денис Тот.
Хрватскиот ракометар почина на 8 април лани откако според обвинителниот акт вечерта претходниот ден, односно на 7 април, тој беше претепан од Ѓоргиевски, Левковска и Костовски пред ноќен клуб во Градскиот парк во Скопје.
Судскиот процес во Основниот кривичен суд Скопје почна на 5 септември лани, со воведни зборови на Обвинителството и одбраната. Обвинителката од ОЈО Скопје, Тања Трајчевска, тогаш го опиша кобниот настан, при што посочи дека расправијата на тројцата обвинети со ракометарот започнала во такси-возило, а потоа продолжила и надвор од него. Преминала во физичка пресметка во која Тот се здобил со повеќе удари, прво тупаници од кои паднал на асфалтот. Додека лежел, пак, според Обвинителството, добил повеќе удари и со нога и со рака по главата и по телото. Од тешките повреди Тот паднал во коматозна состојба, кај него било констатирано и нагмечување на мозокот, дошло до прекин на активноста на мозочните неврони, а сето тоа наредниот ден (8 април) резултирало со смрт.
Судскиот процес траеше помалку од три месеци и заврши на 30 ноември 2022 година кога судечкиот совет со кој претседаваше судијката Елена Илиевска – Јосифовиќ ја изрече пресудата со која тројцата обвинети беа осудени на високи затворски казни.
Судијката при читањето на пресудата тогаш наведе дека одбраната оспорувала дека во овој случај станува збор за убиство со умисла, меѓутоа, како што рече, обвинетите биле свесни за последиците, за што како пример и отежнувачка околност наведе дека Анџело и Андреј сокриле и од Брзата помош дека му задале удари на Тот. Како најверодостојни докази таа ги спомена снимките од безбедносните камери од ноќниот клуб и од системот „Сејф сити“, на кои посочи дека јасно се гледаат дејствијата на обвинетите.
На јавната седница која се одржа на 15 мај во Апелацискиот суд Скопје бранителите на тројцата обвинети бараа повторување на постапката, односно враќање на предметот на повторно судење. Тие тогаш наведоа оти сметаат дека првостепената пресуда е неоснована, а како аргументи посочија на – суштествена повреда на одредбите од кривичната постапка, погрешно утврдена фактичка состојба, повреда на Кривичниот законик и одлуката за кривичната санкција.