Министерот за надворешни работи Никола Димитров упати апел за итна регистрација на македонските граѓани кои се моментно во странство. Повикот особено се однесува до граѓаните кои немаат регулиран престој и немаат начин како да се вратат дома, поради, како што се наведува во апелот, вонредно тешките околности насекаде, откажани летови и затворени граници.
„Се обидуваме да најдеме правилен начин да ви помогнеме да се вратите, но секој сериозен напор претпоставува точни информации. На пример, има наводни информации за 150 граѓани затекнати во Барселона, додека во овој момент во Амбасадата на Северна Македонија во Мадрид има само 16 пријавени. Затоа, ве замолувам ажурно да се пријавите во дипломатско-конзуларните претставништва во земјата каде што сте затекнати или во најблиското ДКП доколку таму немаме мисија“,
Се наведува во апелот на Димитров, каде што е посочено дека адресите електронските адреси на ДКП ги има на сајтот на МНР https://mfa.gov.mk/
МНР ќе прави пресек на дневна основа на состојбата со македонски државјани затечени во странство, за време на епидемијата со коронавирусот, поради што се апелира тие да се пријават до утре до 17 часот. Македонските граѓани треба да остават податоци во ДКП, како име и презиме, број на патна исправа, контакт телефон, земја и град каде што се наоѓаат и информација дали имаат регулиран престој.
„Ќе направиме се’ што можеме, водејќи сметка и за државниот интерес – да се грижиме за македонските државјани затекнати во тешка ситуација во странство. И за државниот интерес да се чува здравјето на нацијата дома,“
наведува Димитров во апелот.