Пратеникот на Левица рече и дека, ако треба, неговата партија, иако банкротирана, ќе ја плаќа разликата во коефициентите на плата на вицепремиерите наспроти министрите, само оваа Влада да не ги прекршува одлуките на Уставниот суд
„Накитена просечност“, според пратеникот на Левица Димитар Апасиев, доминира во новата Влада, која тој ја скенирал по сите основи. Единствено, како што изјави денеска од собраниската говорница, не сака да навлегува во верската и сексуалната определба на идните министри.
Тој пресметал дека во Владата има 12 Македонци и 8 Албанци, 16 мажи и четири жени, дека ДУИ има шест министри, а ЛДП и Беса по еден, но и дека двајца министри се од ВМРО-ДПМНЕ. Не прецизираше на кои министри алудира. Туку, во веќе препознатлив пејоративен стил, посочи дека станува збор за „министерот за ЕУ-фундаментализам“ (веројатно наведувајќи на Никола Димитров) и за „министерот за задгробен живот, кој му беше советник на министерот за смрт“ (веројатно алудирајќи на Венко Филипче).
„Заевизмот станува највисок стадиум на груевизмот. Она што во режимот на Грувски беше заробена држава, сега се нарекува хибриден режим, што значи концентрација на моќ и богатство, која води до карактерно расипување на властодржецот, арбитрарност и страховлада“,
рече Апасиев.
Тој потсети на одлука на Уставниот суд, донесена по претставка на Левица, според која, не постои функција вицепремиер, иако, како што рече, во новата влада е предвидено да има четворица вицепремиери.
„Во прашање е повисок коефицинет на плата за вицепремиерите во однос на министрите. Затоа, еве, Левица, иако е банкротирана партија во Еуростандард банка, се согласува да ви ја надоместува разликата во коефициентите, само да не ги погазувате одлуките на Уставен суд“,
рече Апасиев.