Целата ситуација е комплексна и треба да се размисли со ладни глави и, имајќи ја предвид поларизацијата во државата, не сакаме како институција да се ставаме во корист на кој било од политичките чинители, изјави денеска членот на Комисијата Горан Трпеноски
Државната комисија за спречување на корупција (ДКСК) е при крај со предметот за набавката на вакцините против ковид-19 и има информации, но тие сѐ уште не се целосни, вели Горан Трпеноски, член на Комисијата.
Антикорупциската комисија добила од Народна банка (НБ) документ за извршена исплата на седум милиони и 800 илјади долари за увоз на стока, односно Министерството за здравство средствата ги има исплатено на 15 февруари, а НБ ги има реализирано во корист на „Стабри интернешнл“ од Хонгконг.
Од МЗ, пак, известиле дека не е исплатен аванс на правно лице за купување кинески вакцини, туку на почетокот на оваа година има извршено уплата на средства на име гаранција за да се изврши резервација на 200 илјади дози вакцини од производителот „Синофарм“ од Кина, врз основа на заклучоци од затворена владина седница одржана на 5 февруари.
Трпеноски во врска со случајот рече дека Владата во координација со кинеската влада, преку кинеската амбасада кај нас, по разговорите, одлучила да ги прекине започнатите активности и ги побарала назад уплатените средства, кои биле вратени. Владата на 16 март го задолжила МЗ да ги прекине сите активности, а парите што биле префрлени на „Стабри“ се вратени назад и нема извршено никаква исплата. Владата потоа склучила договор директно со производителот „Синофарм“, рече Трпеноски.
Додаде оти не може да изнесува други детали бидејќи производителите во документите што ги има добиено ДКСК се ставени со клаузула за тајност, по нивно барање.
„Целата ситуација е комплексна и треба да се размисли со ладни глави и, имајќи ја предвид поларизацијата во државата, не сакаме како институција да се ставаме во корист на кој било од политичките чинители“,
рече Трпеноски на денешната прес-конференција.
Опозициската ВМРО-ДПМНЕ вчера објави документ според кој Министерството за здравство ѝ платило 7 800 000 американски долари на посредничката фирма „Стабри интернешнл“ од Хонгконг за набавка на вакцини против ковид-19 од Кина, како продолжение на случајот што го отвори италијанскиот весник „Ла Верита“, исплатата е извршена на 15 февруари 2021 година.
Од опозициската партија, како што рекоа, имаат сознанија дека оваа сума е 60 отсто од вкупната што требало да ја добие посредничката компанија што, според ВМРО-ДПМНЕ, води до заклучок дека Владата влегла во зделка со која една доза од вакцината на „Синофарм“ би чинела 65 американски долари.
Министерството за здравство реагираше со тврдење дека набавката на вакцините од „Синофарм“ е законска и дека тврдењата на опозициската партија изнесени на брифингот се манипулации. Велат дека исплатите што ги прави Министерство за здравство се транспарентни и се објавени на страницата „Отворени финансии“, но потенцираат дека клучен сегмент од договорите за набавка на вакцините против ковид-19 е тоа што секоја држава, па и нашата, се обврзува на доверливост на склучените договори и примените информации.