Антикорупциската комисија предметот го отвори минатата година, кога власта во септември го обвини Филипче дека не пријавил имот во анкетниот лист во ДКСК, односно дека неговата имотна состојба се разликува од претходно, кога го завршил мандатот како министер за здравство
Државната комисијата за спречување на корупцијата (ДКСК) ја запре постапката за анкетниот лист за имотната состојба на пратеникот и лидер на Социјалдемократскиот сојуз (СДСМ), Венко Филипче.
Одлуката е донесена на седница на ДКСК одржана на 28 март годинава, а во неа се наведува дека анкетниот лист на Филипче е целосен и во него немало прикривање податоци за имот.
Во одлуката за запирање на постапката за проверка на податоците за имотната состојба од анкетниот лист на Филипче се вели дека ДКСК прибавила податоци за неговиот имот, како и за имотот на членовите на неговото семејство од Агенцијата за катастар на недвижности, Министерството за внатрешни работи (МВР), Управата за јавни приходи (УЈП), Централниот депозитар за хартии од вредност, Централниот регистар на Република Северна Македонија, како и од финансиските институции во државата.
„По разгледување на прибавените податоци од наведените институции и податоците од изјавата за имотната состојбата и интереси, Комисијата констатира дека целокупниот недвижен имот на пратеникот е пријавен во поднесената изјава за имотната состојба и интереси“,
се вели во одлуката на ДКСК.
Оттаму, Комисијата констатира дека не се потврдуваат наводите од пријавата за повреда на законската обврска за вистинито пријавување на имотната состојба од Законот за спречување на корупцијата и судирот на интереси и дека нема елементи за понатамошно постапување.
Антикорупциската комисија предметот го отвори минатата година кога власта во септември го обвини Филипче дека не пријавил имот во анкетниот лист во ДКСК, односно дека неговата имотна состојба се разликува од претходно, кога го завршил мандатот како министер за здравство.
Од ВМРО-ДПМНЕ тогаш најавија дека ќе поднесат претставка до ДКСК во врска со нерегуларностите во анкетните листови од 2018 и 2024 година на Филипче.
Посочија дека во анкетниот лист од 2024 година Филипче навел дека поседува имот кој во 2018 година не го пријавил во анкетниот лист кога станал министер.
„Филипче како министер за здравство во својот анкетен лист пријавил куќа од 464 квадратни метри изградена во 2017 година, како и стан од 130 квадратни метри стекнат како подарок во 2016 година. Додека, пак, на име заеднички имот пријавил уште еден стан во Скопје од 50 квадратни метри стекнат со договор за купопродажба во 2010 година. Пратеникот Филипче во 2024 година пријавил дека го поседува следниот имот: стан во Скопје стекнат со наследство во 2016 година, кој не го пријавил кога бил министер, а според тоа што навел го стекнал пред да стапи на функцијата; втор стан во Скопје стекнат со наследство во 2016 година кој, исто така, не го пријавил додека бил министер; два стана во Скопје од по 12 милиони денари, стекнати со договор за градба во 2017 година, кои, исто така, ги немал пријавено во анкетниот лист додека бил министер и стан во Центар стекнат во 2008 година со договор за купопродажба, кој, исто така, не го навел додека бил министер“,
Лидерот на СДСМ, пак, изјави дека неговиот имотен лист е идентичен, односно кога ќе се видел вкупниот имот се работело за иста квадратура, а единствената разлика била во начинот на пријавување.
„Во претходниот имотен лист не се става, а сега има простор да се стават имотни листови како документи. Кога ќе се анализира сето, тоа ќе се види дека е исто“,
рече тој.
Тогаш најави и дека ќе бара извинување од премиерот Христијан Мицкоски откако ДКСК ќе излезат со став.
