ВМРО-ДПМНЕ поднесе иницијатива за формирање анкетна комисија, но претседателот на Собранието ја одби со образложение дека е неуредна бидејќи не била испратена со уставното име на државата. По ова, Мицкоски најави дека опозицијата ќе поднесе нова во која ќе ја користи придавката „Северна“
Претседателот на Собранието Талат Џафери смета дека предлогот за формирање анкетна комисија за пожарот во модуларната болница во Тетово е преуранет. Анкетна комисија, според него, може да се формира откако ќе заврши работата на истражните и судските органи.
„Анкетната комисија не може да разгледа прашања коишто се во надлежност на истражните и судските органи. Вообичаено и претходните анкетни комисии, како што беа за гостиварските настани и за Сопот, се формирани постфестум. Според Деловникот, Собранието нема судски и истражни надлежности. Истрагата трае и кога ќе има заклучок од надлежните институции, тогаш може да се вклучи Собранието преку анкетна комисија за да ги потврди или да ги отфрли наодите на овие органи“,
изјави Џафери по денешниот брифинг со новинарите.
По пожарот во модуларната болница во Тетово, опозицијата поднесе барање до Собранието за формирање анкетна комисија, но тоа беше вратено со образложение дека е неуредно бидејќи не било испратено со уставното име на државата.
Лидерот на ВМРО-ДПМНЕ, Христијан Мицкоски, пред неколку дена најави дека ќе поднесат нова иницијатива во која ќе ја користат придавката „Северна“ во уставното име.
„Ќе ја ставиме придавката, јас ќе ја трпам политичката штета. Ако мисли дека така ќе нè навлече да трпиме политичка штета, еве јас ќе се пријавам за доброволец, вистината мора да се знае и виновниците мора да се казнат“,
рече Мицкоски.
Наспроти најавите од собранискиот спикер дека во текот на кампањата ќе ја применува праксата да нема седници во Собранието за да не се злоупотребува за политички цели, Мицкоски порача дека ова се локални, а не парламентарни избори и седниците не се законски забранети, па го посочи прстот во Џафери дека на ваков начин сака да го заштити рејтингот на ДУИ и СДСМ.