Според анкетата спроведена за весникот „Журнал ду Диманш“, која била спроведена по одлуката на Макрон да го распушти парламентот и да распише предвремени избори поради дебаклот на неговата група на изборите за Европскиот парламент, популарноста на францускиот претседател паднала на најниско ниво од 2017 година
За еден месец, од мај до јуни, популарноста на францускиот претседател Емануел Макрон паднала за пет процентни поени на 26 отсто од Французите кои се задоволни од неговата работа, покажува најновата анкета на Ифоп, пренесува весникот „Фигаро“.
Според анкетата спроведена за весникот „Журнал ду Диманш“, која била спроведена по одлуката на Макрон да го распушти парламентот и да распише предвремени избори поради дебаклот на неговата група на изборите за Европскиот парламент, популарноста на францускиот претседател паднала на најниско ниво од 2017 година.
Истражувањето покажува и дека популарноста на францускиот премиер Габриел Атал паднала за четири процентни поени на 41 отсто од испитаниците кои се изјасниле дека се задоволни од неговата работа.
Анкетата на Ифоп била спроведена онлајн од 12 до 20 јуни 2024 година, на репрезентативен примерок од 1 992 луѓе на возраст над 18 години. Маргината на грешка е меѓу еден и 2,2 процентни поени.
Покрај анкетата Ифоп, уште една анкета на агенцијата Ипсос за весникот „Ла Трибјун“ укажува и дека популарноста на Макрон е во постојан пад, иако според таа анкета не го достигнала најниското ниво од кризата на жолтите елеци во 2018 година. Според тоа истражување, Макрон изгубил четири процентни поени, а неговата популарност паднала на 28 отсто, објави агенцијата Франс прес.