Поради ваквите индиции, организацијата бара да се изврши вештачење на снимките од видеонадзорот во зоолошката градина, и да се спроведе надворешна и независна истрага и аутопсија која не би можела да биде лажирана
По објавата за смртта на трите коња во Зоолошката градина во Скопје, оранизацијата за заштита на правата на животните „Анима мунди“ денеска излезе со осуда кон оваа институција, обвинувајќи ја оти е некомпетентна за грижата кон животните во зоолошката и за нивното одржување во живот.
„Згрозени сме, но не и изненадени од трагичната смрт на трите копитари во Зоолошката градина. Добивме индиции за тоа дека во оваа институција работи таков кадар, што е можно и самиот да ги убил, отрул животните. Повторуваме, се укажува на можноста вработени поединци сами намерно да одлучиле да ги убијат“,
се наведеува во соопшението на „Анима мунди“.
Поради ваквите индиции, организацијата бара да се изврши вештачење на снимките од видеонадзорот во зоолошката градина, и да се спроведе надворешна и независна истрага и аутопсија која не би можела да биде лажирана. „Анима мунди“ во соопштението испратено до медиумите бара и одговор на прашањето „дали и колку од ветеринарните лица во зоолошката се доктори специјалисти за лекување на диви животни“.
„Неприфатливо е да исклучително ретки животни на раб на истребување, безумно завршат во супстандардна зоолошка во Македонија – која патем го загуби и кандидатскиот статус за членка на Европската асоцијација на зоолошки градини и аквариуми (ЕАЗА) – и да умрат едно по едно во ист ден“,
додаваат од организацијата.
Оттаму бараат и мораториум за внес на нови животни во зоолошката градина, потенцирајќи дека тие не се експонати туку живи суштества кои, како што додаваат од „Анима мунди“ со третманот што го добиваат во ваквите градини се изложени едиствено на стрес, страв и страдање.
По ова прашање претходно денеска се огласи и опозициската ВМРО-ДПМНЕ, обвинувајќи дека од установа која носела радост за сите генерации, со владеењето на градоначалничката Данела Арсовка, Зоолошката градина е претворена во логор и куќа на стравот.
Во последните два дена беше пријавено дека се угинати три коњи во скопската Зоолошка. Сомневањата, според она што било пријавено завчера во полиција, се дека дека животните биле отруени.
За сомнежите дека станува збор за намерно труење, за агенцијата Мета.мк посведочиле вработени во Зоолошката градина, кои рекле дека сè се случило премногу брзо. Во околината немало никаква друга храна, коњите не давале знаци на болест претходно, а во близина имало и угината птица.
Во мај годинава, во скопската зоолошка градина угина жирафата Каспер, а анализите покажаа дена се работи за инфекција со салмонела.