Директорот на ЦУК информира дека статистиките се алармантни, а пожарникарите секојдневно гаснат по 20 пожари
Шумите се палат намерно за потоа дрвата да бидат поевтини, изјави во гостување на „Клик плус“ на ТВ21, директорот на Центарот за управување со кризи (ЦУК), Стојанче Ангелов.
„Причината за пожарите, за жал, е човекот. Има пожари настанати и од електрични инсталации. Земјоделците остатоците од жито го палат и тоа брзо се шири. Затоа апелирам да не го палат, тоа е забрането. Понатаму алат со искри, за заварување, може да запалат трева и потоа тоа да се прошири затоа што е топло и сува е тревата. Возачи фрлаат отпушоци од цигара и покрај автопатот се пали тревата која брзо се шири. Исто така се палат шуми намерно за потоа дрвата да бидат поевтини. Затоа со државата работиме да го надминеме и овој проблем. Крадците палат шума за потоа да ја купат поевтино“,
рече Ангелов.
Тој додаде дека статистиките се алармантни, а пожарникарите секојдневно гаснат по 20 пожари.
„За нас сите пожари се подеднакво опасни, затоа што и мал пожар за кратко може да дојде до голем пожар. Вообичаено медумите известуваат за големи пожари, но и малите се многу важни. Секојдневно пожарникарите гаснат по 20 пожари. Статистиките се алармантни, во јули имавме 210 пожари, 60 беа ниска трева, а седум во јули влегоа во квалитетна шума и предизвикаа загуба. Досега имаме 223 пожари на отворено. Но, сега имаме многу подобра реакција, и сега имаме рана детекција, сега се нанесува тој почетен удар. Јас сум задоволен од храбрите пожарникари кои веднаш излегуваат на терен“,
изјави Ангелов.