Активистот за унапредување на правата на ЛГБТИ заедницата, Кочо Андоновски, во вечерашната дебата на „360 степени“ вели дека во земјава има промени кон подобро за оваа заедница, но битката за правата е постојана.
Во Собранието веќе функционира група од 14 пратеници кои се залагаат за унапредувањето на правата на ЛГБТИ заедницата, но во неа нема ниту еден претставник од албанските парламентарни партии.
Според Андоновски, не станува збор за тоа дека албанската заедница е позатворена или се базира повеќе на традиционални вредности, туку отсуствува политичко лидерство во албанските партии.
„Политичарите треба да предводат, а не само да следат во општествените прилики. Мислам дека отсуствува лидерство во албанските политички партии. Но, можеби сега е зрак на надеж ребрендирањето на ДУИ во зелена партија, бидејќи секаде во светот зелените партии се предводници на прогресивните политики, застапници на прогресот што треба да се случи во едно општество особено за ЛГБТИ луѓето“,
рече Андоновски.
Тој спомена дека има активсти од Тетово, но сепак дека тоа е премалку во однос на потребите на ЛГБТИ заедницата.
„Во Албанија на пример има многу жив активизам, едно движење кое е многу развиено и ние соработуваме со нив, заедно сме во регионална мрежа. А, исто така, и во Косово. Но, секако ситуацијата е прилично слична како што е кај нас, односно како што е и во целиот регион“,
вели Андоновски.