Епидемиолозите, како што рече таа, ја информирале дека едно од четирите лица, за кои е завршена епидемиолошката анкета, на 18 октомври имало симптоми со температура и дијареја кои траеле еден ден
По утврдувањето присуство на птичји грип кај угината птица во скопската Зоолошка градина, Центарот за јавно здравје (ЦЈЗ) и Институтот за јавно здравје (ИЈЗ) извршиле епидемиолошка анкета на 15 вработени во Зоолошката, при што за четворица во текот на утрешниот ден ќе бидат издадени решенија за здравствен надзор, а кај еден од нив, кој во петокот пројавил симптоми на покачена температура и дијареја, ќе биде извршено тестирање за присуство на птичји грип. Уште едно лице не е исконтактирано, информира директорката на ИЈЗ, Марија Андоновска.
„Здравствен надзор согласно протоколите не подразбира карантин и изолација, туку медицинско следење во текот на следните две недели дали ќе пројават каков било симптом кој понатаму би требало да се испитува дали се работи за птичји грип. Тие секојдневно ќе бидат контактирани од епидемиолози од ИЈЗ и ќе се следи нивната здравствена состојба“,
изјави денеска Андоновска пред Институтот за јавно здравје.
Епидемиозлозите, како што рече таа, ја информирале дека едно од четирите лица, за кои е завршена епидемиолошката анкета, на 18 октомври имало симптоми со температура и дијареја кои траеле еден ден.
„Тоа лице ќе биде тестирано во текот на утрешниот ден бидејќи препораките од страна на епидемиолозите и микробиолозите се дека по појавата на првите симптоми во рок од пет дена треба да има тестирање“,
појасни Андоновска.
Таа нагласи дека нема опасност од птичји грип за посетителите кои биле во Зоолошката градина, доколку немале директен контакт со заболените птици.
„За да се пренесе птичји грип, треба да има близок контакт со заболено или мртво животно или да има близок контакт со некој од секретите, измет или слично од овие заболени или мртви животни. Тоа значи дека ризикот е мал, доколку посетителите немале близок контакт“,
потенцираше Андоновска.
Таа оцени дека надлежните институции вчера реагирале брзо и навремено, согласно законските прописи и протоколи.