Повика на свесност кај учениците, родителите и наставниците и да не се дозволи препишување на државната матура, бидејќи, со тоа се прави штета, а не добро
Матурантите од Скопје, Битола и Штип ќе полагаат државна матура во амфитеатрите на универзитетите, соопшти денеска министерката за образование и наука, Весна Јаневска, коментирајќи ги просторните улови со кои распологаат учениците за спроведување на државната матура.
Во моментот, како што кажа таа, се обезбедуваат условите за полагање, оти меѓу матурантите треба да има растојание од метар и половина.
„Во Штип, Битола и во Скопје ќе ги користиме Универзитетите. Материјалите се веќе во подготовка, мобилни телефони нема да се употребуваат, односно тестаторите ќе бидат задолжени да ги спроведуваат учениците да си ги остават мобилните телефони на соодветно место во просторијата, каде што ќе се полага матурата“,
вели Јаневска.
Повика на свесност кај учениците, родителите и наставниците и да не се дозволи препишување на државната матура, бидејќи, со тоа се прави штета, а не добро.
„Нашето образование е на ниско ниво и со лош квалитет. Треба да го подобриме. Иднината на Македонија е во умните глави, кои ги има, но само треба да ги мотивираме да почнат што е можно повеќе да работат на себе. Затоа што нивната иднина зависи од нив самите“,
кажа таа.
Посочи дека за средните училишта од Штип веќе е одлучено, односно матурантите ќе ја полагаат матурата во простории и амфитеатри на Универзитетот „Гоце Делчев“.
„Кампус 4 е определен за регионалниот центар и Гимназијата, а во Кампус 2 се за останатите училишта. Значи сите училишта во Штип кои кажале дека имаат потреба од соодветеен простор ќе полагаат во амфитеатрите на Универзитетот“,
рече министерката.
Првиот испит – мајчин јазик (македонски, албански, турски и српски) ќе се одржи на 31 мај. Вториот екстерен предмет, кој може да биде математика или странски јазик (англиски, француски, германски или италијански) ќе се полага на 11 јуни.
Интерните испити ќе се спроведуваат од 17 до 25 јуни, а во тек се презентациите и одбраните на проектните задачи.