Поголемиот дел од својот свештенички живот го поминал надвор од Соединетите Американски Држави, особено во Перу, каде што бил пастор, професор, едукатор и бискуп. Ова го прави еден од ретките американски кардинали со длабоко искуство во Латинска Америка
Американецот Роберт Франциско Превост е новиот папа. Тој го зеде името Лав Четиринаесетти. Роден е на 14 септември 1955 година и е американски католички прелат кој е поглавар на Католичката црква и суверен на државата Ватикан од 8 мај 2025 година.
Поголемиот дел од својот свештенички живот го поминал надвор од Соединетите Американски Држави, особено во Перу, каде што бил пастор, професор, едукатор и бискуп. Ова го прави еден од ретките американски кардинали со длабоко искуство во Латинска Америка.
Тој е префект на Дикастеријата за бискупи, една од највлијателните позиции во Ватикан. Превост е умерен, способен за дијалог и поврзување на различни струи во Црквата, сметаат аналитичарите. Неговиот стил и приоритети се блиски до реформистичкиот дух на папата Франциск, поради што ужива поддршка од некои кардинали кои сакаат континуитет.
„Гардијан“ пишува дека Превост е ѕвезда во подем и го цитира католичкиот весник „Крукс“ според кој Превост е познат по својата цврста проценка и способност за слушање. „Гардијан“ пишува дека Превост го засенил фаворитот Паролин.
Тој се соочува со критики за начинот на кој се справувал со случаите на сексуална злоупотреба за време на неговата служба во Перу и претходно во Соединетите Држави. Иако неговите бранители нагласуваат дека постапил според црковните правила, некои критичари веруваат дека не реагирал доволно транспарентно и решително.