Официјалниот став на Бугарија е Декларацијата на парламентот и поофицијален став нема од тоа, изјави денеска бугарскиот амбасадор во земјава Ангел Ангелов, одговарајќи на новинарско прашање дали ставот на Бугарската академија на науките (БАН) со кој се негира македонскиот јазик е и официјален став на Софија.
Ставот на Бугарската академија на науките е реакција на Повелбата за македонскиот јазик на МАНУ од 3.декември, во која вели дека македонскиот јазик е дијалект на бугарскиот јазик.
Овој заклучок предизвика бура реакции во македонската јавност. Од Владата за „360 степени“ велат дека Договорот за добрососедство кој двете земји го потпишаа во 2017, е на официјалните јазици од двете договорни страни (македонски и бугарски) и таму е нагласено дека двата текста имаат еднаква важност. Владата ја повикува бугарската страна да го почитува договореното.
„Апелираме на соодветното и единствено можно читање и почитување на Договор за пријателство, добрососедство и соработка меѓу двете земји. Уште еднаш потсетуваме дека двете земји се обврзаа да споделуваат заеднички ставови против говор на омраза, национализам или какви било провокации во двете држави, а кои отскокнуваат од духот на Договорот, со кој минатото и историјата, ги поставивме како темел на заедничката иднина“, стои во одговорот од Владата за „360 степени“.
Оттаму додаваат дека посебноста на македонскиот јазик е признаен и од Обединетите Нации каде што покрај името Република Северна Македонија, за јазик стои: македонски јазик.
Премиерот Зоран Заев најави официјална реакција, а министерот за надворешни работи Никола Димитров повика на „мудрост и деликатност, големина во разбирањето и почитувањето на грижите и достоинството на другиот“.
Актуелниот претседател на МАНУ, академик Таки Фити, вели дека има информации оти не сите академици на БАН го поддржале ставот, и укажа дека „тука има инволвирање на државната бугарска политика во овие работи, што не е во ред“.
„Нема да ги расипеме односите со БАН, ќе разговараме, ние сме се договориле дека нема прашања за кои не може да разговараме, дури и за најсензитивните“, изјави академик Фити.
Од Институтот за македонска литература сметаат дека со негирање на македонскиот идентитет се врши негирање на македонскиот национален идентитет.
Декларацијата што ја усвои бугарскиот Парламент во октомври годинава, ја содржи поддршката за целосна интеграција на Северна Македонија во ЕУ, но под услов земјава да исполни серија услови-првиот е реален напредок во спроведување на Договорот за добрососедство, вториот сет услови е за работата на мешовитата комисија, при што се споменуваат Гоце Делчев, ВМРО и третата група е никаде во документите на ЕУ да не фигурира „македонскиот јазик“, односно ако веќе мора, да се користи терминот „официјален јазик на Република Северна Македонија“.