Американската амбасадорка Кејт Мери Брнс очекува Северна Македонија во најкус можен рок да го добие своето столче во НАТО, а се надева дека е можно уште во март да добие позитивен сигнал и од ЕУ.
„Процесот на ратификација сега се ближи кон крајот и многу скоро македонското знаме ќе биде кренато во седиштето на НАТО. Во однос на ЕУ, длабоко бевме разочарани од недобивањето датум во октомври, но сега сме охрабрени, бидејќи од тоа што го видовме изминатите недели има повеќе позитивни изјави од лидерите на ЕУ и од престолнините на ЕУ за значаењето на Северна Македонија, за перспективите за нејзина интеграција, за можностите да отвори преговори со ЕУ и се надеваме дека следните недели и месеци, дури и до март, ќе има многу позитивен сигнал за Северна Македонија, а наскоро и покана за ЕУ преговори“,
вели амбасадорката во интервју за ТВ Сител.
Таа смета дека клучен придонес за остварување на стратегиските цели дал Преспанскиот договор. Најавите за негова ревизија од страна на ВМРО-ДПМНЕ, според неа, предизвикуваат вистинска загриженост и граѓаните не треба да бидат збунети или заведени за тоа колкав е влогот во тој процес.
„Важно е да не се заборави дека добрососедските односи се предуслов за интеграција и членство во ЕУ и во НАТО. Ние знаеме дека Преспа беше компромис, имаше тешки преговори кои подразбираа отстапки од двете страни. Но, она што Преспа го направи е што конечно го откочи патот за Северна Македонија да стане НАТО-сојузник и да го продолжи патот кон ЕУ. Но, уште поважно, и помогна на Северна Македонија да се придвижи напред од позиција на стагнација каде не можеше да се развива политички, економски со иста брзина како многу од своите соседи, во смисла на ЕУ-интеграцијата. Затоа мислам дека е многу важно да се има на ум дека не само што ЕУ го препознава значењето на одржувањето добри односи со соседите како дел од изгледите на Северна Македонија за ЕУ, туку навистина се работи за иднината на оваа земја, за тоа дали лидерите ќе можат да обезбедат таков економски раст и можности, работни места, трговија, странски инвестиции, какви што би сакале да се реализираат. Многу е важно да не се загрозува оваа извонредна трансформација која се случува. Дури и магазинот ,Економист’ на крајот на годината ја издвои Северна Македонија како најтрансформирана земја во 2019 година, главно поради решавањето на отворените прашања со соседите. Да се заштити таа трансформација, да се продолжи движење напред и да не се загрозат сите овие достигнувања со гледање наназад е нешто што се надеваме дека луѓето ќе го сфатат многу сериозно“,
вели таа.
Американската амбасадорка смета дека дополнителен придонес за забрзување на интеграцијата на земјата ќе даде усвојувањето на законот за ЈО и засилената борба против корупцијата.
„Огромно е значењето на донесувањето на законот, особено за владеењето на правото, за транспарентност, за одговорност. Ја истакнуваме и важноста на тоа случаите на СЈО да продолжат на кредибилен начин во Јавното обвинителство. Така ќе се создаде доверба кај граѓаните и ќе се потврди дека поединци кои извршуваат високи функции ќе сносат одговорност за какви било злоупотреби. Ги поттикнуваме сите политички лидери да седнат заедно, да ги надминат разликите, да ги стават настрана партиските интереси и да го донесат законот пред распуштањето на парламентот. Во однос на податоците од Транспаренси Интернешанал, важно е да се каже дека Индексот на перцепција ја мери само перцепцијата за корупција, а не самата корупција и тоа е важно. Јасно е дека корупцијата предизвикува огромна загриженост и борбата против неа е клучна затоа што е најголема пречка за позитивната иднина на оваа земја, за нејзиниот развој, за се што се надева да постигне. Мислам дека е многу важно да се препознае дека независно дали се работи за корупција на високо ниво во форма на поткуп на високи службеници или за ситна корупција која граѓаните ја чувствуваат на дневна основа, кога чувствуваат дека треба да платат за да го запишат детето на училиште или за да добијат работа или фер третман во болница, сите овие форми на корупција ја изобличуваат економската ситуација и креираат недоверба во општеството. Затоа неопходно е сите партии, властите на сите нивоа и целото општество да се обединат и да се поттикне сеопфатна акција за справување со корупцијата“,
изјави американската амбасадорка.
Таа изрази очекување дека ќе се спроведат фер и непречени избори од кои ќе прозлезе влада која посветено ќе продолжи по патот на евроатланските интеграции. Сепак, предупредува дека „не треба да се дозволат какви било надворешни или внатрешни влијанија што ќе сакаат да го попречат и оцрнат демократскиот процес или на друг начин да се замешаат во изборите.“