Другото лице, исто така македонски државјанин, кое во сообраќајната незгода се здобило со тешки повреди е хоспитализирано на одделение за реанимација во клинички центар, соопштија попладнево од Министерството за надворешни работи и надворешна трговија
Амбасадата на Република Северна Македонија во Белград е во редовна комуникација со семејството на 39-годишниот македонски државјанин кој утрово загина во сообраќајна несреќа кај Суботица и работи на навремено завршување на административните процедури за транспорт на посмртните останаки во земјава.
Другото лице, исто така македонски државјанин, кое во незгодата се здобило со тешки повреди е хоспитализирано на одделение за реанимација во клинички центар, соопштија попладнево од Министерството за надворешни работи и надворешна трговија.
„Ве информираме дека до Амбасадата на Република Северна Македонија во Белград е доставена информација за сообраќајна незгода што се случила во близина на Суботица, во која животот го загубил македонски државјанин, роден во 1986 година. Во незгодата е повредено уште едно лице, исто така македонски државјанин, кое со тешки повреди е хоспитализирано на одделението за реанимација во клиничкиот центар. Амбасадата е во редовна комуникација со семејството на починатото лице, со цел навремено завршување на сите неопходни административни постапки за транспорт на посмртните останки во Република Северна Македонија“,
се наведува во соопштението на Министерството.
Сообраќајната несреќа, како што објавија српските медиуми, се случила денеска наутро во 5:15 часот на автопатот Нови Сад – Суботица.
Според пишувањата на српските медиуми, возилото марка „киа“ со македонски регистарски таблички, кое се движело по автопатот кон Хоргош, излетало од патот кај населбата Вишњевац, помеѓу клучката Жедник и наплатната станица во Суботица, а потоа се превртело.
Загинатиот Н.А. бил сопатник во возилото зад чиј волан бил 60-годишниот А.А. кој е тешко повреден.