Уште еднаш потенцираме дека нема да влетаме во замката што ни се подметнува. Нема да оставиме ниту минимум простор дека Алтернатива на каков било начин самата придонесе за процесите кои неминовно следуваат, велат од партијата
На седница на Централното собрание која ќе се одржи во недела со почеток во 16 часот, во партиското седиште во Тетово, Алтернатива ќе го изнесе конечниот став дали ќе продолжи да биде дел од владејачкото мнозинство.
„Согласно статутарните одредби, денес одлучивме конечниот став да го изградиме на седница на Централното собрание која ќе се одржи во недела со почеток во 16 часот, во партиското седиште во Тетово. Водејќи се од тоа што е најдобро за иднината на државата и за иднината на Алтернатива, расудуваме трезвено, без емоции, целосно свесни за предизвиците кои нè очекуваат. Уште еднаш потенцираме дека нема да влетаме во замката што ни се подметнува. Нема да оставиме ниту минимум простор дека Алтернатива на каков било начин самата придонесе за процесите кои неминовно следуваат“,
се наведува во соопштението од Алтернатива.
Најтесното партиско раководство на Алтернатива е во перманентно заседание, додаваат оттаму, и нагласуваат дека со внимание ги разгледуваат сите околности кои ги нарушуваат принципите врз кои требаше да почива Европската коалиција.
„Особено начинот на кој некој го потценува нашиот учинок пред 12 месеци за спас на владејачкото мнозинство, изборот на Димитар Ковачевски за премиер и следствено, обезбедувањето на почеток на преговори со ЕУ“,
додаваат од Алтернатива.
Одлуката што ќе ја носи Алтернатива, дали останува да биде дел од Владата, следува откако вчера Алијанса за Албанците предводена од Арбен Таравари и официјално одлучи да влезе во Владата.
Владејачката СДСМ, исто така, вчера на Централен одбор го овласти лидерот и премиер Димитар Ковачевски да ги заокружи преговорите за поголемо мнозинство и да предложи реконструкција на Владата.