За нашата земја се очекува поизвесна агендата по изборите во Бугарија, која сега го кочи почетокот на преговорите со ЕУ
Албанија ќе го одржи својот редовен состанок за стабилизација и асоцијација со Европската Унија на 1 март, додека за Северна Македонија состанокот е одложен, јави МИА од Брисел.
Ова ќе биде 11. Совет за стабилизација и асоцијација за Албанија, клучен форум за земјите кандидати за членство, каде што се разговара за реформскиот напредокот.
Како што јавија од прес-службата на Советот на ЕУ, состанокот в понеделник ќе се фокусира на стратегијата за зачленување во ЕУ и исполнување на критериумите за пристап во Унијата – политичките, економските и финансиските.
Северна Македонија требаше да ја одржи редовната седница на овој совет на крајот на овој месец, но состанокот е одложен без прецизен датум. Се очекува да биде поизвесна агендата после изборите во Бугарија, која го кочи процесот за почеток на преговори со Скопје.
Пред неколку недели министерот за надворешни работи на Северна Македонија, Бујар Османи, оцени дека ова одлагање не го смета за притисок од страна на ЕУ врз Скопје да попушти пред барањата на Софија.