Димоски е добитник на државната награда од вкупно 25 пријавени на конкурсот
Ако поетот замолчи, ќе замолчат и душата на јазикот, а душата на нацијата е и јазикот, порача поетот, есеист и преведувач Славе Ѓорѓо Димоски, кому денеска му беше врачена државната награда „23 Октомври“ за долгогодишно остварување во областа на културата и уметноста.
Токму јазикот и писмото, рече Димовски во своето обраќање, се едни од нашите идентитетски столбови, а македонскиот идентитет е втемелен во македонскиот јазик и кирилицата.
„Јазичната политика е во темелот на националната политика. Најзначајниот елемент на културната политика е дека македонскиот идентитет е втемелен во македонскиот јазик и кирилицата. Јазикот и писмото се еден од идентитетските столбови на сите нас. Ако поетот замолчи ќе замолчи и душата на јазикот. А душата на нацијата е и јазикот. Ја примам оваа награда во името на оваа вечна земја. На мојата вечна земја. Нашата Република е мала, но огнена. Таква била Крушевската Република, таква била Асномската република, таква е и оваа република денес. Толку ни ги стеснале границите што нема простор за друго име освен за Република Македонија“,
рече Димоски во својот говор.
За него, државната награда „23 Октомври“ е една од најзначајните во земјава.
„Јас доаѓам од сферата на литературата и ракувањето со зборовите. Токму Македонската револуционерна организација ја собра тогашната македонска интелигенција, токму во неа се поставени и темелите на идниот стандардизиран македонски јазик, токму од нејзините пазуви се изнедри златната книга ‘За македонцките работи’ во која Мисирков го постави фундаментот на идниот современ македонски јазик“,
потенцира Димоски.
Димоски е добитник на државната награда од вкупно 25 пријавени на конкурсот за „23 Октомври“.
Поезијата на Димоски е преведена на над 35 јазици на сите континенти. Автор е на шест книги за деца и четири книги со есеи, а превел над триесетина книги на поети од словенското јазично подрачје. Застапуван е во сите антологии на македонската поезија објавени во земјава и светот по 1982 година. Добитник е на повеќе домашни и меѓународни признанија. Основач е и долгогодишен раководтиел на фестивалот „Поетска ноќ во Велестово“.