Агенцијата за храна и ветеринарство добила писмено известување од овластениот дистрибутер на производите на „Хип“ за Македонија дека во земјава не е увезен спорниот производ кој пред неколку дена беше повлечен од супермаркети во Австрија
На македонскиот пазар нема небезбедна храна за бебиња од брендот „Хип“ – соопштија денеска од Агенцијата за храна и ветеринарство (АХВ).
Оттаму велат дека АХВ до овој момент нема добиено нотификација преку Системот за брзо известување за небезбедни производи на Европската Унија дека во земјава е пласирана спорната кашичка од морков и компир на брендот „Хип“, која пред неколку дена од безбедносни причини беше повлечена од познат синџир супермаркети во Австрија поради наводно присуство на отров за глувци.
„Дополнително, од страна на операторот со храна, овластен дистрибутер на производите на ‘Хип’ за Македонија, добивме писмено известување дека во земјава воопшто нема увезено од спорниот производ“,
велат од АХВ и додаваат дека и натаму ќе ја следат состојбата и ќе реагираат доколку има потреба.
Пред два дена, „Хип Македонија“ на својата официјална фејсбук-страница објави дека спорниот производ, кој беше повлечен од австриски синџир на супермаркети, не се увезува, ниту се продава на македонскиот пазар.