Земени се мостри од храната и осум брисови од работните површини и опремата за да се направат лабораториски испитувања
Вонредна контрола времено ја затвори кујната во студентскиот дом „Пелагонија“ во скопската населба Кисела Вода откако излегоа информации дека шест студенти добиле труење од храна и завршиле во болница.
Од Агенцијата за храна и ветеринарство (АХВ) заедно со Центарот за јавно здравје и Државниот санитарен и здравствен инспекторат соопштија дека утрово извршиле вонредна инспекциска контрола во кујната и се земени примероци за испитување.
„Од страна на инспекторите за храна, кујната е времено затворена. Наредени се мерки за генерално чистење и дезинфекција на објектот. За лабораториско испитување, земени се шест мостри од храната која се послужувала и осум брисови од работните површини и опремата“,
соопшти АХВ.
Студентите повторно ќе имаат кујна во студентскиот дом откако ќе се добијат резултатите од лабораториското испитување со цел да се потврди безбедноста на храната, како и по дополнителната контрола што ќе се направи за да се провери дали се преземени сите мерки за отстранување на недостатоците.