Директорот на Агенцијата за храна и ветеринарство, Николче Бабовски, додаде дека официјален ветеринар ќе го испитува случајот и ќе врши проценка на околностите под кои се случил инцидентот. Ќе се испитува и дали сопственикот на кучињата ги почитувал законските одредби и условите пропишани во актуелната Годишна наредба за здравствена заштита на животните, како и условите за чување на кучињата
Директорот на Агенцијата за храна и ветеринарство (АХВ), Николче Бабовски, денеска изјави дека според направениот увид, во нападот на осумгодишникот во Пинтија учествувале две кучиња кои сега се изолирани и ставени под надзор на ветеринар.
„Од направениот увид е утврдено дека во немилиот настан учествувале две кучиња кои имаат сопственик. Кучињата се уредно идентификувани со микрочип и тие сега се изолирани и ставени под надзор на официјален ветеринар. Дворот во кој се чуваат кучињата е соодветно заграден и на влезот е поставен предупредувачки знак ‘Пази, куче’,
вели директорот на АХВ, Николче Бабовски, кој додаде дека официјален ветеринар ќе го испитува случајот и ќе врши проценка на околностите под кои се случил инцидентот.
Бабовски додаде дека ветеринар ќе го испитува случајот и ќе врши проценка на околностите под кои се случил инцидентот. Ќе се испитува и дали сопственикот на кучињата ги почитувал законските одредби и условите пропишани во актуелната Годишна наредба за здравствена заштита на животните, како и условите за чување на кучињата.
Кучињата што го нападнале осумгодишното дете биле регистрирани и во Кинолошкиот сојуз.
Претседателот на Кинолошкиот сојуз, Јордан Христовски, вели дека се работи за кучиња од расата англиски мастиф – кучиња од поголем раст, но, како што рече, тие учествувале на изложби, па согласно тоа, се добро одгледани и социјализирани.
„Се работи за кучиња од поголем раст, меѓутоа напоменувам дека кучињата учествувале на изложби, што значи дека се социјализирани затоа што на изложби за убавина мора кучињата да бидат добро одгледани и социјализирани со други животни и со луѓе“,
вели претседателот на Кинолошкиот сојуз, Јордан Христовски, во изјава за МИА.
Осумгодишното дете починало откако било нападнато од кучето на својот сосед, а за време на нападот во дворот било присутно и другото куче. По нападот, детето било префрлено во Градската општа болница „Св. Наум Охридски“ во Скопје, каде што им подлегнало на повредите.
Претходно денеска од ОЈО Скопје информираа дека на местото на несреќата е направен увид од страна на јавен обвинител и дека се преземаат мерки за испитување на целиот случај.