Во однос на резултатот од лабораториско тестирање спроведено на Факултетот за ветеринарна медицина, на мостра од домат по потекло од Република Албанија, кај која е утврдено зголемено присуство на пестициди, за АХВ се работи за мостри на домати кои не се официјално земени од надлежните инспекциски органи, туку од физичко лице и се доставени во Факултетот
Пратките на домати кои се увезуваат од Албанија се под засилен надзор и за секоја се врши лабораториско испитување, велат од Агенцијата за храна и ветеринарство (АХВ) демантирајќи ги денешните обвинувања од страна на Цветан Трипуновски од ВМРО-ДПМНЕ кој рече дека надлежните државни органи дозволиле увоз на небезбеден зеленчук со концентрации на пестициди над максимално дозволените граници.
„Документите кои ги презентираше Трипуновски не се тајна, напротив, тие се само уште една потврда дека државата си ја врши работата, односно дека контролите се спроведуваат. Како и досега, сè додека со лабораториски наод не се потврди безбедноста, пратките со храна, вклучително и со зеленчук, се ставаат под официјален надзор. Не смее и не се пуштаат во промет пред да се добие задоволителен резултат за нив. Во случај на добивање на незадоволителен резултат пратката се поништува или се наредува враќање во земјата на потекло“,
стои во соопштението од АХВ.
Од АХВ го повикаа Трипуновски доколку вистински располага со докази за сторен криминал за кој повикува на одговорност и бара оставки, да ги приложи до надлежните институции, а не преку прес-конференции да ја заплашува јавноста дека државата ги труе граѓаните со небезбедна храна, се вели во соопштението.
Во однос на резултатот од лабораториско тестирање спроведено на Факултетот за ветеринарна медицина, како што се наведува, во објава на социјалните мрежи, мостра од домат по потекло од Република Албанија, кај која е утврдено зголемено присуство на пестициди, за АХВ се работи за мостри на домати кои не се официјално земени од надлежните инспекциски органи, туку од физичко лице и доставени во Факултетот.
„За нив нема никаков доказ за потеклото на доматите и од каде се земени мострите и затоа резултатот од страна на АХВ се смета за сомнеж“,
се вели во соопштението.
Од АХВ посочуваат дека преку инспекторите веќе спроведуваат дополнителни, засилени контроли на местата каде што се продаваат домати од оператори кои извршиле увоз од Република Албанија, со цел утврдување на потеклото на доматите, односно дали станува збор за производ од увозно или од домашно производство и дали доколку се увезени, ја имаат потребната документација која опфаќа и извршени лабораториски анализи.
„Од почетокот на годинава досега, земени и лабораториски тестирани се 63 мостри од зеленчук и тоа на домати, краставици и пиперки, од кои 26 мостри само од домати. Позитивни на пестициди се само две пратки и тоа една со краставици од Албанија и една пратка со пиперки по потекло од Албанија, која сè уште се наоѓа по официјален надзор“,
информираат од АХВ.
Минатата година биле земени вкупно 133 мостри од увозен зеленчук на краставици, пиперки, домати и други производи. Потврдени се лабораториски четири позитивни резултати на пестициди и тоа два резултати од домати увоз од Албанија, еден позитивен резултат од јаболка и еден резултат позитивен на пестициди во пратка со компир, увоз од Белгија.
„Небезбедните пратки се нештетно уништени, а за оние по потекло од Република Албанија известени се и надлежните државни органи во земјата извозник, за преземање на активности во однос на подобрување на безбедноста на производите кои се извезуваат“,
додаваат од АХВ.
Денеска, на прес-конференција, Цветан Трипуновски од ВМРО-ДПМНЕ рече дека Министерството за земјоделство, шумарство и водостопанство (МЗШВ) и министерот Љупчо Николовски дозволиле увоз на зеленчук од Албанија со поголемо ниво на пестициди од дозволеното. Тој додаде дека неколку камиони со отровен зеленчук биле влезени во Македонија и пуштени во промет.
Трипуновски го повика Јавното обвинителство веднаш да реагира.