Претседателот на Демократската унија за интеграција, Али Ахмети во рамки на своите партиски активности вечерва одржа средба со граѓаните и симпатизерите во Гостивар. Ахмети, кој со трибините и настапите стартуваше паралелно со отпочнувањето на активностите на т.н. Огнени момчиња, во Гостивар беше придружуван од Артан Груби, еден од функционерите на ДУИ од кого токму тие бараат оставка или разрешување.
Во своето обраќање Ахмети не се осврна на внатрешните конфронтации во партијата која ја предводи, туку беше сосредоточен на борбата против корупцијата и обврските кои произлегуваат на патот кон ЕУ. Во тие рамки, тој излезе со оценка дека власта не корумпира, туку стравот од нејзиното губење.
„Наша мисија, наша задачи е да бидеме повеќе посветени, да бидеме поангажирани, не само на телевизиските екрани и тв дебатите, туку и со конкретна активност и посветеност во борба против криминалот и корупцијата бидејќи има и луѓе кои велат дека се плашат да не ја загубат власта, а потоа прават лоши работи. ДУИ затоа бара ветинг. Со него ќе престанат сите гласини и приказни. Со него ќе им дозволиме на правосудните органи да кажат кои се оние кои ја злоупотребуваат довербата. Сакаме правда. Веродостојна и со доверба во одлуките што се носат. Оттука ги повикуваме сите да се најдеме на заеднички пат. Да го почнеме ветингот и чесно да го завршиме, затоа што само така можеме да одиме напред. Со ветингот ќе биде опфатен секој политичар, секој функционер од централно до локално ниво“,
истакна Ахмети.
Лидерот на ДУИ повика и на здружување на силите за отворање на европската перспектива на Македонија.
„Ги слушам и внимателно ги следам реакциите во врска со измената на Уставот. Политичките партии имаат должност да го едуцираат населението затоа што оваа држава е силна со Македонци и Албанци, во оваа држава лојалноста кон државата зависи од тоа колку државата e лојалнa кон граѓаните. Не сме далеку од членството во ЕУ, но мораме да си ја завршиме домашната задача. Задачите, како што се воспоставување на одредени стандарди, владеење на правото, борба против криминалот и корупцијата не се тешки, но без членство во ЕУ многу е тешко да ги запреме луѓето кои бараат подобар живот. Треба да бидеме посилни во конфронтациите што не очекуваат“,
рече пред присутните првиот човек на ДУИ, Али Ахмети.