„Мораме да дадеме сè од себе да ја обезбедиме и запечатиме европската иднина на нашите граѓани со покажување лидерство и решителност. Нема друга алтернатива. Европа ни е единствениот пат“, напиша лидерот на ДУИ на Фејсбук
Срдечно им честитам на сите Албанци, на премиерот на Албанија, Еди Рама, и на целиот тим што неуморно работи на отворање на првото преговарачко поглавје. Ова денеска на својот фејсбук-профил го напиша лидерот на Демократската унија за интеграција Али Ахмети коментирајќи го денешното отворање на првиот кластер „Основни вредности“, на меѓувладина конференција ЕУ – Албанија во Луксембург, со што Тирана практично ги почнува преговорите за членство во Унијата.
„Одлучни вести од Луксембург за Албанија, Албанците и целиот регион на Југоисточна Европа. Посакувам Албанија напорно да работи кон остварување на целта за членство во Европската Унија во 2030 година“,
напиша Ахмети на Фејсбук.
Ахмети вели дека мора да се спомене очајот што Северна Македонија денеска не е до Албанија поради блокада на нашиот европски пат, како резултат на неспроведувањето на преговарачката рамка одобрена од Светот на Европската Унија и Северна Македонија.
„Мораме да дадеме си од себе да ја обезбедиме и запечатиме европската иднина на нашите граѓани со покажување лидерство и решителност. Нема друга алтернатива. Европа ни е единствениот пат“,
вели тој.
Албанскиот премиер Еди Рама денеска рече дека Албанија одбележува важен момент во процесот на европска интеграција и дека Европа е единственото место каде што сакаат да бидат. Албанија, додаде дека има амбиција да се интегрира во ЕУ во 2030 година.
Албанскиот премиер истакна дека за членство во ЕУ не е доволно само да се подигне европскиот дух, туку треба да се работи на промена на реалноста во земјата, со цел да се обезбеди дека си ќе функционира согласно Уставот.
На денешната меѓувладина конференција ЕУ – Албанија во Луксембург ќе биде отворен првиот кластер „Основни вредности“, со што Тирана практично ги почнува преговорите за членство во Унијата.
Албанија во 2009 година поднесе барање за влез во Европската Унија, а првата меѓувладина конференција за пристапни преговори се одржа во 2022 година. Досега напредокот на Албанија на патот кон ЕУ беше поврзан со напредокот на Северна Македонија.
Одлуката Албанија да почне преговори за членство во ЕУ по кластери минатиот месец ја донесе Комитетот на постојани претставници на владите на земјите членки на ЕУ (Корепер), со што земјата се одвои во патот кон ЕУ од С Македонија.