Агенцијата за разузнавање ги повика пратениците да го донесат новиот закон кој се однесува на нивното работење, пред да се распушти Собранието. Текстот, кој е во собраниска процедура, според Агенцијата мора да се донесе пред заокружување на процесот за членство во НАТО.
„Новиот закон, кој првпат после 25 години е во собраниска процедура, е резултат на повеќемесечна работа на тим од Агенцијата, во консултација со академската заедница, Министерството за правда, партнерските служби од земјите членки на НАТО и ЕУ и специјализираните тела од Алијансата. Потребата од донесување на новиот закон се наметна поради новонастанатите промени во безбедносното опкружување на државата, во регионални и глобални рамки, што бара итно, ефикасно и навремено реагирање на терен. Со новиот закон, Агенцијата се дефинира како служба надлежна за надворешно разузнавање, која собира, обработува, анализира, разменува, чува и штити податоци и сознанија за асиметрични, хибридни и сајбер закани од странство“,
соопштија од Агенцијата за разузнавање.
Со измените, велат од Агенцијата, се прави јасна разлика меѓу надлежностите на Агенцијата за разузнавање и Агенцијата за национална безбедност, што досега не беше случај.
„Новиот закон за АР ги заокружува реформите во безбедносниот систем на државата што официјално започнаа со донесувањето на Законот за оперативно-техничката агенција (ОТА), во април 2018 година, Законот за Агенција за национална безбедност (АНБ), во мај 2019 година и Законот за координација на безбедносно разузнавачката заедница, во мај 2019 година“,
се вели во соопштението од Агенцијата.
Законот кој е во собраниска процедура, велат од Агенцијата, ја департизира институцијата, ги подобрува и изедначува правата на вработените со нивните колеги од другите служби и воведува позиција заменик-директор.
„Тоа истовремено ќе овозможи ново кадровско екипирање и зајакнување со нов потребен профил на млади образовани кадри кои треба да ја градат својата кариера и иднина во нашата држава, се додава во соопштението“,
велат од Агенцијата за разузнавање.
Една од клучните придобивки од предложеното законско решение, велат од Агенцијата, е што ќе им овозможи подобра заштита на класифицираните информации кои ги создаваат и кои ќе ги примаат од партнерските служби, особено по влезот во НАТО.