Таа негира дека чекале претходната влада да замине за да ја објават санкцијата и вели оти ако од Вашингтон го имале подготвено случајот додека сѐ уште биле на власт, ќе го објавеле тогаш
Агелер вели дека луѓето не бегаат ако немаат што да кријат и додава дека најдобриот начин да се врати довербата на јавноста овде е да има отворен процес, а тоа значи дека некој што е обвинет за одредени дела треба да се соочи со последиците
Прашана околу тоа како се чувствувала кога постојано била во контакт со тие личности, а лично знаела дека се под истрага за корупција, рече дека е жално кога луѓето ја лажат во лице, а таа е свесна за тоа
ФОТО: Принтскрин
Американската амбасадорка во земјава Анџела Агелер вели дека ставањето на Артан Груби на „црната листа“ на САД не е политички мотивирано или темпирано.
Агелер, во интервју дадено за подкаст на македонско-американската алумни асоцијација од серијалот интервјуа за борба против корупцијата, вели дека случајот со Артан Груби е објавен кога бил завршен, односно тоа не било поврзано со неговото заминување од владината функција.
Таа негира дека чекале претходната влада да замине за да ја објават санкцијата и вели оти ако од Вашингтон го имале подготвено случајот додека сѐ уште биле на власт, ќе го објавеле тогаш.
„Кога нечие име официјално ќе биде ставено на листата, кога ќе биде објавена таа одлука, можам да ве уверам дека процесот бил темелен. Не било случајно и не е политички мотивирано. Не е политички темпирано. Ништо од тоа. Кога Вашингтон ќе го заокружи процесот, тогаш се прави објавата“,
рече Агелер.
Околу тоа, како што рече, што ќе се случи потоа, е друго прашање.
„Знам дека има луѓе кои зборуваат за повторно воведување закони и рестриктивни мерки, за повторно прегледување на целиот случај. Но, доказите се тука и голем дел од нив и е можно да се состави случај од тоа што е достапно овде и во непосредниот регион. Оттука, дали ние во амбасадата се надеваме дека тоа ќе се случи? Да, но исто така, ние не сме правосудни органи и јас не можам да му диктирам никому, но се надевам дека ова ќе поттикне некаква акција. И морам да кажам дека овој, последниот случај на санкционирање, се чини дека предизвика прилично голема реакција, и мислам дека тоа е добра работа“,
додаде таа.
Таа вели дека нема поим каде се наоѓа Артан Груби, а на новинарска забелешка дека тој е во Албанија, Агелер рече „ако има една работа што во оваа земја се прави многу, многу добро, тоа е да се пуштаат гласини“.
Според неа, ирелевантно е каде е Артан Груби, но вели дека генерално гледано, луѓето не бегаат ако немаат што да кријат.
„Оттука, она на што ние се надеваме, она што јас се надевам, е токму како што велите, одговорност – да ја преземеш одговорноста ако не си направил ништо погрешно. И ова важи за секој кој е ставен под санкции, односно за секој кој е под некаква судска постапка во оваа земја. Ако немаш што да криеш, тогаш врати се и докажи го тоа. Постои правен процес овде, и дел од тој процес започна со господинот Груби во врска со различни обвиненија што му се покренати. И, пак, ќе речам, ако нема што да крие… и знам дека многу се зборува за – и знам дека е така – дека има влијание во судството – тоа може да биде проблем, но луѓето во оваа земја сакаат да видат дека се води процес. Луѓето сакаат да разберат за каков процес станува збор и зошто одредени работи се прават. И најдобриот начин да се врати довербата на јавноста овде е да има отворен процес, а тоа значи дека некој што е обвинет за одредени дела треба да се врати и, како што велиме, да се соочи со последиците“,
рече таа.
Прашана околу тоа како се чувствувала кога постојано била во контакт со тие личности, а лично знаела дека се под истрага за корупција рече дека е жално кога луѓето ја лажат во лице, а таа е свесна за тоа.
„Знаете, во многу случаи, јас од почеток знам. Многу сум свесна кога луѓето ме лажат во лице и тоа е жално, но тогаш, пак, знам дека не треба да верувам многу во она што го кажуваат. Јас сум американски амбасадор. Кога имаме интеракција со Владата, тоа го правиме. Јас нема да престанам да си ја работам својата работа затоа што верувам дека некој ме лаже, и тоа е дел од природата на нашите интеракции и тоа не влијае на временските рокови“,
одговори Агелер.
На новинарско прашање дали тоа што на „црната листа“ има премиер, политичари, бизнисмени се должи на слабиот политички естаблишмент, дека се тие лесно коруптивни или на неказнивоста во ова општество, Агелер се осврна на тоа дека корупцијата ја има и на понсиките нивоа, а за тоа често е информирана од нејзините средби со луѓето.
„Сите знаеме дека корумпиран може да биде поранешен премиер, градоначалник, политичар, олигарх, но исто така може да биде и доктор во болница или, пак, медицинска сестра или наставник. Една од работите што ми е многу интересна кога зборувам, не само со новинари и политичари, туку и кога патувам низ земјата и разговарам со луѓето за тоа како изгледа секојдневниот живот, е дека тие секојдневно се соочуваат со корупција, а многу често тоа се оние помали примери кои ги допираат лично“,
рече таа.
Според неа, тоа што корупцијата во земјава повеќе ја нарекуваат „рак“ е затоа што не е ограничена само на еден дел од општеството.
„Таа е проширена во целото општество. И затоа, за да се избориме со корупцијата, мислам дека треба да гледаме пошироко, подлабоко, похолистички затоа што големата, крупната корупција се храни со тие помали секојдневни примери“,
рече Агелер.
На почетокот на декември американскиот Стејт департмент соопшти дека поранешниот прв вицепремиер Артан Груби од Демократската унија за интеграција (ДУИ) и судијата во Апелацискиот суд во Скопје, Енвер Беџети, се ставени на т.н. „црна листа“ на САД.
Како што објавија оттаму, Груби и Беџети се најдоа на листата поради вмешаност во значителна корупција, конретно поради примање поткуп во врска со судските процеси поврзани со ексдиректор на поранешната Управа за безбедност и контраразузнавање (УБК), Сашо Мијалков.