„Јас ја немам временската рамка, тоа е одлука на Вашингтон, но можам да ве уверам дека додека зборуваме, има одреден број имиња кои се земаат предвид“, вели американската амбасадорка
Американската амбасадорка во земјава, Анџела Агелер, денеска изјави дека т.н. „црна листа“ на САД е многу динамична и дека секогаш е отворена на неа да се најдат нови имиња.
Агелер ова го кажа одговарајќи на новинарско прашање по отворањето на првата Конференција за борба против корупцијата во Западен Балкан, организирана од Амбасадата на САД во Скопје, а во соработка со Меѓународното биро за наркотици и спроведување на законот (INL).
Прашана дали може да се очекуваат нови имиња на т.н. „црна листа“, американската амбасадорка рече:
„Листата е многу динамична. Постојано се разгледуваат имиња и се дискутираат, јас ја немам временската рамка, тоа е одлука на Вашингтон, но можам да ве уверам дека додека зборуваме, има одреден број имиња кои се земаат предвид и како и секогаш сме отворени кон додавање нови лица и ќе се погрижиме да дознаете кога тоа ќе се случи“.
Последни кои се најдоа на „црната листа“ на САД од земјава се ексшефицата на згаснатото Специјално јавно обвинителство (СЈО), Катица Јанева, и актуелниот градоначалник на Општина Карпош и лидер на политичката партија ГРОМ, Стевчо Јакимовски.
Американскиот Стејт департмент за нивното санкционирање информира на 18 март годинава, наведувајќи дека Јанева и Јакимовски ги поткопале владеењето на правото и вербата на јавноста во демократските институции и јавните процеси во земјата.
Покрај Јанева и Јакимовски, Стејт департментот на „црната листа“ ги стави и членовите на нивните потесни семејства.
На т.н. „црна листа“ на САД минатата година се најдоа и имињата на ексвицепремиерот за економски прашања Кочо Анѓушев, бизнисменот Орце Камчев, бизнисменот Сергеј Самсоненко, струшкиот градоначалник Рамиз Мерко. На оваа листа тие им се придружија на експремиерот Никола Груевски и на поранешниот директор на УБК, Сашо Мијалков.