Пендаровски и амбасадорите размениле информации за улогата на ОБСЕ во контекст на руската инвазија врз Украина и неодложната потреба за обнова на мирот и стабилноста и спречување на натамошни конфликти
Претседателот Стево Пендаровски денеска ги прими шефовите на петте највлијателни земји во ОБСЕ. На средбата со Пендаровски присуствувале шефот на мисијата на ОБСЕ во државава, Килиан Вал, и амбасадорите при мисијата на ОБСЕ на САД, Мајкл Карпентер, на Обединетото Кралство на Велика Британија и Северна Ирска, Неил Буш, на Германија, Геса Браутигам, на Италија, Стефано Балди и на Франција, Кристин Фаж. На средбата присуствувала и амбасадорката на САД во Северна Македонија, Анџела Агелер.
Пендаровски и амбасадорите, како што соопштуваат од неговиот кабинет, размениле мислења за актуелните состојби и случувања во Европа и регионот, како и за приоритетите на македонското претседавање со ОБСЕ.
Соговорниците размениле информации за улогата на ОБСЕ во контекст на руската инвазија врз Украина и неодложната потреба за обнова на мирот и стабилноста и спречување на натамошни конфликти.
Претседателот Пендаровски посочил дека Северна Македонија е целосно подготвена да ја преземе одговорноста и да се соочи со сите предизвици.
Во Скопје од денеска се одржува Конференција за справување со антисемитизмот во регионот на ОБСЕ, како прва во серијата значајни конференции и состаноци што ќе се организираат во земјава за време на претседавањето на Република Северна Македонија со Организацијата во текот на 2023 година