Материјалите од нелегално прислушуваните разговори да не се користат како докази, а судењата да се одложат сè додека не се донесе новиот закон за јавно обвинителство. Ова на денешното рочиште го побараа адвокатите на обвинетите во случајот ТНТ, за уривањето на станбениот комплекс „Космос“ на бизнисменот Фијат Цаноски, чие судење се врати на почеток.
Само што почнаа со воведните говори, адвокатите побараа да се прекине расправата бидејќи ја спорат надлежноста на јавниот обвинител Бурим Рустеми од поранешното СЈО. Адвокатите побараа да се назначи нов обвинител, посочувајќи дека основното јавно обвинителство нема надлежност да постапува по овие предмети.
На судењето се појави и обвинетиот поранешен градоначалник на Гази Баба, Тони Трајковски, кој пред судот кажа дека, иако сè уште имал денови од боледувањето откако беше претепан, одлучил да дојде, за, како што рече, да не биде причина за одложување на постапката.
Поранешниот министер Миле Јанакиески во воведниот говор изјави дека ќе докаже дека е невин и дека не потпишал ниту еден документ за уривање на „Космос“. Јанакиески се повика на одлуката на Уставниот суд кој на барање на Фијат Цаноски пресудил дека бизнисменот не бил политички дискриминиран.
Во предметот е обвинет и експремиерот Никола Груевски, кој е во бегство.