Адвокатската комора му ја одзела лиценцата на адвокатот на три години, откако од Центарот за социјални работи во Свети Николе бил пријавен дека нападнал и им се заканувал на службеници на Центарот, во врска со случај што го водел
„360 степени“ пред еден месец објави сторија за друг спор кој токму сега осомничениот и негова колешка го имаа со Адвокатската комора
Надлежните органи во земјава распишаа меѓународна потерница по осомничениот кој на 25 ноември со умисла подметна пожар во Адвокатската комора, користејќи коцки керозин и плинска запалка.
Станува збор за адвокатот Александар Ристески, кому неколку недели пред настанот му била одземена лиценцата од страна на Комората поради дисциплински прекршок.
Меѓународната потерница е објавена на веб-страницата на Министерството за внатрешни работи (МВР), која како што е наведено е распишана по наредба на Основното јавно обвинителство Скопје.
Пријавата за прекршокот на Ристески, како што објави ТВ Телма, во Адвокатската комора ја поднеле од Центарот за социјални работи во Свети Николе, од каде се жалеле дека адвокатот нападнал и им се заканувал на службеници на Центарот во врска со случај што го водел тој.
Службениците, како што рекле од Адвокатската комора за телевизијата, биле повикани како сведоци и нивните изјави се документирани, по што дисциплинскиот суд на Комората, која е независно тело, донел одлука за одземање на адвокатската лиценца на Ристески на три години.
Тој, велат од Комората, иако има право, не поднел жалба на одлуката на дисциплинскиот суд.
Основното јавно обвинителство Скопје вчера соопшти дека отворило истрага против 41-годишен скопјанец за намерно предизвикување пожар во зградата каде што се сместени просториите на Адвокатската комора, а во кој е предизвикана материјална штета во износ од околу 150 000 евра.
Според Обвинителството, осомничениот се гони за кривичното дело тешки дела против општата сигурност.
„На 25 ноември осомничениот со умисла подметнал пожар во просториите на Адвокатската комора на РСМ на улицата ‘Методија Шаторов Шарло’, предизвикувајќи на тој начин значителна опасност за животот и телото на луѓето и за имотот од поголеми размери“,
соопштија вчера од Јавното обвинителство на Република Северна Македонија.
Како што информираа оттаму, тој за пирот се подготвил една недела претходно, кога набавил секира со гумирана рачка, плинска запалка, заштитни ракавици и 48 коцки за потпалување со керозин.
На 25 ноември со своето возило дошол во близина на зградата каде што се сместени просториите на Адвокатската комора во Општина Аеродром и маскиран со „фантомка“ со секирата ја скршил влезната врата. Потоа на скалите ги наредил коцките керозин, врз нив ставил повеќе плински боци и ги запалил.
По ова не губел време и, според истрагата, само триесетина минути по настанот со возилото ја напуштил државата, преку граничниот премин „Блаце“.
Од Обвинителството соопштија дека бараат на осомничениот да му биде одреден притвор, кој ќе започне да се применува по неговото пронаоѓање и апсење.
Напластени „недоразбирања“
Случајот по кој на сега осомничениот Александар Ристески му е одземена лиценцата на три години не е единствениот спор кој тој го има со Адвокатската комора. Пред точно еден месец, „360 степени“ објави сторија за друг спор кој го имаше токму Ристески и негова колешка со Комората. При изработката на сторијата, ниту Комората ниту Ристески не обелоденија дека имаат и други „недоразбирања“.
Причината за сторијата која ја направи „360 степени“ беше дисциплинската постапка која Адвокатската комора ја отворила против Ристовски и адвокатката Рајна Наумовска – Мојсовска. Тие, двајцата, основале Здружението на адвокати на Отворен Балкан на 21 април 2024 година соседна Србија. Целта, според изјавите кои ги дадоа за „360 степени“, била да се олесни адвокатската пракса меѓу Северна Македонија, Албанија и Србија. Според тогашниот Статут на Адвокатската комора, немало забрана за адвокатите да пристапуваат во други здруженија.
Но, на 1 јуни 2024 година, Адвокатската комора одржува собрание на кое Статутот се дополнува со членот 8 кој пропишува „адвокатите се организираат и здружуваат само и единствено во Адвокатската комора“. На 11 јули 2024 година дисциплински обвинител покренува дисциплинско обвинение до дисциплинскиот суд на Адвокатската комора. Првата причина запишана во обвинението е дека отвориле невладина организација во Србија спротивно на членот 8 од Статутот, и покрај тоа што во моментот на регистрација на невладината, Статутот не забранувал такво нешто. Овој случајот е предмет на работа и на Уставниот суд.
Кога „360 степени“ се обрати до Адвокатската комора за случајот, оттаму добивме потврда дека се води постапка, но не сакаа да навлезат во коментирање на случајот се додека се води дисциплинската постапка.