По обелоденувањето на информациите во јавноста, бројот на членовите на групата „Јавна соба“ од 7.400 денеска се намали на 600, а таа е преименувана во „Само за возрасни“
Полицијата го откри администраторот и ги има телефонските броеви на членовите на затворената група „Јавна соба“ на социјалната мрежа Телеграм на која, според сведочења на членови, еден месец се објавувани експлицитни фотографии и видеа на малолетнички од земјава, потврдуваат извори од истрагата.
Кога вчеравечер Радио МОФ и А1.он први објавија информација за постоење на ваква група на апликацијата Tелеграм, групата насловена како „Јавна соба“ имаше над 7.400 членови. Но, денеска бројот на членовите нагло опаднал на 600, а таа е преименувана во „Само за возрасни“, објави А1.он.
Синоќа прво дополнителната заменик министерка во МВР Славјанка Петровска објави на Фејсбук, а денеска тоа го потврди и техничкиот премиер Оливер Спасовски, Бирото за јавна безбедност веднаш започнало истрага, но повеќе детали засега не се откриваат.
„Веднаш по добиената пријава преземени се мерки и активности за расчитување на случајот. Секторот за компјутерски криминал и форензика веднаш контактира со мрежата Телеграм, за добивање на потребните податоци околу функционирањето на оваа група и воедно го известивме за содржините што се објавени“,
изјави претходно денеска портпаролот на МВР Тони Ангеловски.
Известено е и Јавното обвинителство и се преземаат мерки за расчистување, а воедно апелира до граѓаните да пријават во полицијата злоупотреба на фотографии не само за овој, туку и за кој било друг случај.
Дополнителната заменик-министерка за труд и социјална политика Санела Шкриељ истакна дека се работи координирано со Министерството за внатрешни работи и со Министерството за образование и дека во моментов немаат пријава од родители. Таа апелираше до сите родители кои имаат информација дека нивните деца биле изложени и биле дел од оваа група да се обратат до центрите за социјални рабoти за помош.