Усвоен е и извештајот за изведување настава со физичко присуство, а донесен е и протокол за снимање долгометражни филмови, во услови на епидемија
Владата на денешната седница одобри продолжен престој на ученици во основните училишта и почнување со работа на дневните центри за лица со попреченост. Исто така, усвоен е извештајот за изведување настава со физичко присуство, а донесени се и протоколи за работа на игротеките, кои досега беа затворени, како и за снимање долгометражни филмови.
Владата, на денешната седница, го разгледа и усвои записникот од вчерашниот четврти состанок на Главниот координативен кризен штаб и врз основа на заклучоците и препораките на Комисијата за заразни болести ги донесе следните одлуки и протоколи:
- Одобрена е организација на продолжен престој на учениците во основните училишта за одделенијата кои ќе почнат настава со физичко присуство, со препорака продолжениот престој да се организира и реализира со ученици од иста паралелка и од исто одделение, без мешање на различни паралелки и одделенија.
- Владата ја прифати препораката на Комисијата за заразни болести да почнат со работа дневните центри за лица со попреченост со стриктно почитување на мерките и веќе усвоениот протоколот за работа во услови на епидемија со ковид-19.
- На предлог на Комисијата, Владата го усвои предложениот протокол и препорача отпочнување со организација за снимање со долгометражни филмови, со почитување на мерките за спречување на ширење на ковид-19 инфекција.
- На денешната седница е усвоен и протоколот за работа на игротеките во услови на епидемија со ковид-19, при што се препорачува строго почитување на мерките за спречување на ширење на ковид-19 Одговорноста за целосно спроведување на одредбите од протоколот е обврска на вршителите на дејноста.
- Владата денеска го усвои извештајот на Комисијата за давање согласности за организирање настава со физичко присуство во училиштата за барањата на основачите доставени во периодот од 25.09.2020 до 29.09.2020 година.
Извештајот на Комисијата е на следниот линк.