Фирмите од овие дејности бараат итно да се донесат протоколи за почеток со работа или доколку се одлучи принудно да останат затворени, да се донесат мерки за финансиска поддршка со кои ќе ја преживеат кризата
Доколку новата влада итно не донесе протоколи за работа или мерки за економска помош на игротеките, приватните установи за едукација и грижа на деца, објектите за свадби, родендени и крштевки, ќе следуваат протести. Ова го посочија од Сојузот на стопански комори на Македонија од каде што порачаа дека повеќе од 1 000 субјекти се пред пропаѓање.
„Со формирање на новата влада, претпријатијата од овие дејности очекуваат во најкраток можен рок да се реши моменталната состојба, во спротивно својот револт ќе го истакнат на протест. Да се затворат принудно со месеци без услови со кои ќе можат да ја преживеат кризата е нечовечки и помош или деблокада се единствениот излез“,
велат од Сојузот на стопански комори на Македонија.
Претпријатијата од овие дејности бараат итно да се донесат протоколи за почеток со работа или доколку се одлучи принудно да останат затворени, да се донесат мерки за финансиска поддршка со кои ќе ја преживеат кризата.
„Овие сектори се принудно затворени, немаат никакви приходи и иако сѐ уште им се генерираат трошоци за плати, наемнини и режиски трошоци за нив веќе со месеци нема никаква финансиска поддршка“,
потенцираат од Сојузот на стопански комори на Македонија.
Оттаму истакнуваат дека во континуитет се доставувани писмени барања со издржани предлози до надлежните институции, како и протоколи за работа согласно оние од земјите во регионот и пошироко, каде што на овие дејности уште пред неколку месеци им е овозможено да работат.
Како мерки за економска помош бараат субвенции за плати за сите досегашни и идни месеци додека се принудно затворени од институциите, во износ на минималната бруто-плата; одложување од обврските за плаќање кон претпријатијата кои вршат комунални дејности до крајот на годината; како и ослободување од обврските за аконтативно односно однапред плаќање на данок на добивка и персонален данок на доход. Како четврто барање е наведено ослободување од плаќање данок на имот спрема општините и Градот Скопје за месеците за кои принудно не вршат дејност; петто – мораториум со репрограмирање за кредитните обврски спрема банките до крајот на годината и еднократна парична помош за сите објекти врз основа на претходно определени критериуми и параметри засновани на годишни приходи и платените даноци во изминатите години.