Не била два, туку 10 милиони евра е сумата пари која ја украле газдите од државната помош наменета за исплата на минималец од 14.500 денари за работниците, објави „Телма“ повикувајќи се на владини извори.
Според податоците, станува збор за повеќе од 4500 компании и 2 милиони евра кои првично ги објави УЈП, а меѓу фирмите има и медиум. Од Владата најавуваат дека ќе бараат Обвинителството кривично да ги гони одговорните лица во компаниите.
„Ги чекаме податоците од УЈП по што јавно ќе ги објавиме имињата на компаниите кои не ги исплатиле платите на работниците кои ги добија од државата. Ќе побараме од Обвинителството покренување постапка за утврдување кривична одгворност против одговорните лица во компаниите“
изјавил за „Телма“, генералниот секретар на Владата, Драги Рашковски.
Дел од фирмите под притисок на јавноста вчера почнале да ги исплаќаат платите за работниците, а денеска и синдикалните организации побараа кривична одговорност и најстроги санкции за фирмите кои ја злоупотребиле помошта од државата и не ги исплатиле примињата кон работници.