Во своите воведни зборови, обвинителката рече дека Бојан Јовановски-Боки 13 како претседател на „Меѓународниот сојуз“ ги довел во заблуда бизнисмените од градежниот сектор, Силјан Мицевски и Адриан Амзоски, и лажно им прикажувал дека ќе обезбеди државно земјиште за изградба на центарот
Да формираш хуманитарна организација е нешто со што секој може да се гордее. Но, да формираш хуманитарна организација и од самиот почеток таа да ја темелиш на лага дека зад тоа стои ЕУ и сите да ги убедуваш во тоа е врв на еден криминален девијантен ум.
Вака обвинителката Вилма Русковска денеска во судницата во Основниот кривичен суд во Скопје ги започна воведните зборови за случајот „Меѓународен сојуз“, кој, според обвинителството, се однесува на измама на бизнисмени кои исплатиле околу еден милион евра за наводен проект за Европски центар за возрасни лица.
Во своите воведни зборови, обвинителката рече дека Бојан Јовановски-Боки 13 како претседател на „Меѓународниот сојуз“ ги довел во заблуда бизнисмените од градежниот сектор, Силјан Мицевски и Адриан Амзоски, и лажно им прикажувал дека ќе обезбеди државно земјиште за изградба на центарот, како и субвенции од страна на државата.
„Хуманитарната организација почнува со работа, се организира помош за најранливата категорија луѓе. Но, ова трае кратко. На 8 јули 2018 година е усвоен акциски план за 2017/2018 година каде што под точка три е предвиден проект Европски центар за возрасни лица и мобилен сервис. Со ова започнува една голема измама. Сите имале своја улога во оваа голема измама“,
рече Русковска.
Доведени во заблуда, бизнисмените, според Русковска, преку Македонска авторска агенција, исплатиле високи суми пари. Мицевски во име на фирмата „Пелистер“ исплатил 719 905 евра на сметката на сведокот Лилјана Тодоровска, а Амзоски во име на „Дрим Билдинг“ 233 821 евро на сметката на Јасна Ерцеговиќ, која се водела како наводен коавтор на проектот.
Ерцеговиќ е заменик-претседателката на невладината организација „Меѓународен сојуз“ и таа заедно со асистентката на Боки, Христина Блажевска, според Русковска, имале удел така што ги изготвувале договорите. Исто така, Ерцеговиќ, парите што ѝ биле уплатени од Амзоски, тврди обвинителката, му ги дала на Јовановски. Парите што ги уплатил Мицевски, пак, според обвинителството, Тодоровска ги извадила и веднаш биле земени од Блажевска, која исто така му ги дала на Јовановски.
Обвинетата Фросина Ременски, според Русковска, користејќи ги својот углед и авторитет како потпретседателка на СДСМ, а потоа и на Собранието, одела на средбите на Боки со оштетените бизнисмени. Обвинителката тврди дека таа му давала совети и упатства како бизнисмените да стекнат доверба во наводниот проект, а потоа и да ги уплатат парите.
„Можеби во текот на судењето ќе слушнете дека дел од обвинетите навистина верувале во овој проект, но дали еднаш се запрашале дали се реализирале овие договори? Не, ниту еднаш. Дали се вратени парите на оштетените? Не. И за тоа не се запрашале. Но, ќе слушнете како се прославувало после склучувањето на договорите. Ќе слушнете и ќе видите како Миле Јовсновски на име враќање и давање позајмица на име ‘БМЈ медиа груп’ на 1 ТВ уплатил 226 000 евра, а човекот од 1991 е невработен. Ќе слушнете и ќе видиме како Јасна Ерцеговиќ префрлила 243 000 евра, за кои нема никакво легално покритие. Миле Јовановски веројатно во својата одбрана ќе каже дека пиштолот кај него е наследство од неговиот покоен татко. И да е така, постои легална процедура за да може да го поседува“,
рече Русковска алудирајќи на нелегалното оружје пронајдено кај таткото на Боки.
Својот воведен збор обвинителката го заврши со мисла од Махатма Ганди: „Не смеете да ја загубите вербата во хуманоста. Хуманоста е океан. Ако се извалкаат само неколку капки, тоа не значи дека целиот океан е извалкан“.
Од друга страна, пак, сите обвинети во случајот рекоа дека го разбираат обвинението, но се изјаснија за невини. Судското рочиште продолжи и во тек се воведните зборови на одбраната.