Ова е уште една промена во раководните структури на здравствените установи во земјава во изминатите денови. Пред три дена нови директори добија и три универзитетски клиники во Скопје – за гастроентерохепатологија, дигестивна хирургија и пластична и реконструктивна хирургија
Државниот санитарен и здравствен инспекторат (ДСЗИ) доби нов директор. На функцијата доаѓа д-р Димитар Ангелески, кој го наследува досегашниот директор Кирил Лазов, соопшти Министерството за здравство (МЗ).

Ангелески е специјалист ортопед. Во професионалната кариера работел во Службата за итна медицинска помош при Здравствениот дом – Скопје, а ја извршувал и функцијата директор на Медицинскиот симулациски центар.
„Од Државниот санитарен и здравствен инспекторат, а со тоа и од новиот директор, очекувам да ја зајакне улогата на Инспекторатот во заштитата на јавното здравје, што е можно побрза и повидлива инспекција на терен со доследна примена на прописите, како и континуирана отчетност и транспарентност во работата“,
рече министерот за здравство Сашо Клековски на средбата со Димитар Ангелески.
Упати благодарност и до досегашниот директор, д-р Кирил Лазов, за неговата работа и професионален ангажман.
Инаку, ова е уште една промена во раководните структури на здравствените установи во земјава во изминатите денови. Пред три дена нови директори добија и три универзитетски клиники во Скопје – за гастроентерохепатологија, дигестивна хирургија и пластична и реконструктивна хирургија.
На чело на овие клиники дојдоа д-р Владимир Андреевски, д-р Панче Караѓозов и д-р Благоја Србов.
