Случајот до директорот на ДЗС бил пријавен пред неколку дена од страна на граѓанин, кој му се пожалил дека од советник за урбанистичко планирање при ДЗС му биле побарани 500 евра за да добие позитивно мислење потребно за изградба на објект. Ангелов го упатил граѓанинот случајот веднаш да го пријави во Одделот за организиран криминал при МВР
Директорот на Дирекцијата за заштита и спасување (ДЗС), Стојанче Ангелов, ја поздрави акцијата на МВР и Обвинителството во чии рамки е приведен вработен од Дирекцијата под сомнение дека примал поткуп.

Случајот до Ангелов бил пријавен пред неколку дена од страна на граѓанин, кој му се пожалил дека од советник за урбанистичко планирање при ДЗС му биле побарани 500 евра за да добие позитивно мислење потребно за изградба на објект. Директорот на ДЗС го упатил граѓанинот случајот да го пријави во Одделот за организиран криминал при МВР.
„Ја поздравувам денешната акција на МВР и воедно ги повикувам граѓаните кои се соочуваат со незаконско поведение на кој било вработен во ДЗС, истото веднаш да го пријават во надлежните институции“,
порача Ангелов и им заблагодари на останатите вработени во ДЗС кои работат чесно и совесно.
МВР во координација со ОЈО Скопје приведе вработен во ДЗС поради сомнение за примање поткуп, а по насоки на јавен обвинител, лицето е задржано во полициска станица.
