Од МВР велат дека истиот ден, во 8:50 часот, во СВР Охрид се јавила 51-годишната Љ.К. од Охрид, мајка на осомничениот К.К., која пријавила дека Љ.Ѓ. (49), татко на претепаната девојка, телефонски упатил закани кон нејзиниот син и кон целото нивно семејство

СВР Охрид поднесе кривична пријава против 31-годишниот К.К. од Охрид поради постоење основи на сомнение за сторено кривично дело тешка телесна повреда, по член 131 став 3 од Кривичниот законик. Охридскиот суд му изрече мерки на претпазливост, а во полициска станица заврши и таткото на повредената девојка поради пријавени телефонски закани.
Според информациите од Министерството за внатрешни работи (МВР), настанот се случил на 15 ноември 2026 година околу 2 часот по полноќ. По претходна вербална расправија која започнала во неговиот дом, а продолжила во неговиот автомобил, пријавениот физички ја нападнал својата 26-годишна девојка од Охридско.
Откако го сопрел возилото, насилството продолжило, при што девојката од силината на ударите изгубила свест и паднала. Таа веднаш била пренесена во Општата болница во Охрид, а потоа била префрлена и во специјалната болница „Св. Еразмо“ во Охрид, каде што лекарите ѝ констатирале тешки телесни повреди.
По преземените полициски мерки, истиот ден во 5:05 часот наутро, К.К. бил лишен од слобода и задржан во полициска станица. По барање на Основното јавно обвинителство (ОЈО), Основниот суд во Охрид донесе решение со кое на осомничениот му се изречени мерки на претпазливост.
Од МВР велат дека истиот ден, во 8:50 часот, во СВР Охрид се јавила 51-годишната Љ.К. од Охрид, мајка на осомничениот К.К., која пријавила дека Љ.Ѓ. (49), татко на претепаната девојка, телефонски упатил закани кон нејзиниот син и кон целото нивно семејство.
Постапувајќи по оваа пријава, полициски службеници во 13:20 часот го лишиле од слобода и го задржале во станица таткото на девојката, против кого исто така ќе биде поднесен соодветен поднесок.
Случајот со насилството во Охрид, каде 31-годишен маж ја претепа својата девојка и ја остави во бессознание на улица, предизвика огромен гнев и вознемиреност во јавноста. Додека повредената Сара сè уште се наоѓа во болница, нејзината мајка, Ирена Ѓорѓиеска, објави тврдења за случајот и за наводни обиди за забошотување на случајот.
Во својата објава на Фејсбук, мајката изразува загриженост и страв за безбедноста на нејзината ќерка, особено по информациите дека осомничениот бил пуштен на слобода.
