Според организаторите на платформата, новиот законик е директна последица на притисокот од Европската комисија, која и во годинешниот Извештај за напредокот нотираше негативни последици од скандалозните измени на законодавството од септември 2023 година

Најавата за донесување нов Кривичен законик е чекор напред во борбата против политичката корупција, но не нуди конкретен одговор како да се спроведе правдата и да се исполнат очекувањата на граѓаните, оценуваат од платформата „Разговори за иднината 12.05“.
Според организаторите на платформата, новиот законик е директна последица на притисокот од Европската комисија, која и во годинешниот Извештај за напредокот нотираше негативни последици од скандалозните измени на законодавството од септември 2023 година. Од „Разговори за иднината“ предупредуваат дека борбата против корупцијата не смее да се сведе на гола реторика и обиди за перење совест за претходните гревови.
Во соопштението се потсетува дека измените од 2023 година беа донесени во итна постапка со европско знаменце, без амандмани од тогашната опозиција која обезбеди кворум. Указот, додаваат од платформата, веднаш беше потпишан од тогашниот претседател на државата, додека Уставниот суд на 25 февруари 2026 година ја запре иницијативата за испитување на нивната уставност.
„Со скандалозните измени на Кривичниот законик се намалија се намалија затворските казни за злоупотреба на службената положба што отвори можност за брзо застарување на кривичните дела. сторени со политичка корупција, се избришаа одредби кои предвидуваа казни за злоупотреба на јавни набавки и оштетувања на државниот Буџет. Проценката кажува дека околу 800 поранешни и сегашни носители на функции ги злоупотребуваат овие скандалозни измени на Кривичниот законик за ослободување од кривична одговорност“,
стои во реакцијата.
Оттаму сметаат дека е дојдено крајно време од декларативни заложби да се премине на дела и корумпираните политичари без разлика на етничка, верска и партиска припадност да одговараат и покрај скандалозните измени на Кривичниот законик во 2023. Од платформата предлагаат три законски интервенции.
Воведување нов член 112-а во Кривичниот законик кој ќе биде веднаш по членот за незастарливост на кривични дела геноцид и воени злосторства, со кој кривичниот прогон и конфискацијата на нелегално стекнатиот имот за избрани, именувани лица и службеници нема да застаруваат. Со ваква законска интервенција сметаат дека ќе се испрати јасна порака дека никогаш повеќе нема да има ниту јавна ниту скриена амнестија за политичари.
Се предлага и во актуелниот Кривичен законик, во главата триесетта каде се дефинирани „кривични дела против службената должност”, во членот 359-а кој го дефинира кривичното дело противправно стекнување и прикривање имот да се зголемат минималните казни затвор и тоа од шест месеци на три години и од една на пет години, а максималните казни затвор да се зголемат од пет на десет години и од осум на петнаесет години.
Третата интервенција што ја предлагаат од „Разговори за иднината во 12:05“ е итно усвојување на посебен закон со кој ќе се создадат механизми за проверка на движниот и недвижниот имот на сите актуелни и поранешни функционери, како и на нивните потесни семејства.
