„Отидовме во болница, ја прегледаа на неколку одделенија, затоа што беше удрена во главата, на лицето и на вратот. Отидовме во полиција, направен беше записник, каде ќерка ми раскажа сè што се случи, дека ја давел и не можеше воздух да земе“, раскажува мајка на 21-годишна девојка од Битола за која вели дека била жртва на својот партнер
По пријавата, осомничениот доброволно дошол во полициската станица заедно со свој родител. Но, кога полицајците им кажале дека ќе биде задржан, избегал преку прозорец
Ја давел, ја удирал со тупаници и ѝ се заканувал дека ќе ја убие. Вакво насилство од својот партнер пријавила 21-годишна битолчанка на десетти ноември.
Пред полицијата раскажала дека насилството траело околу година и половина, но од страв досега не го пријавувала, објави ТВ Телма.
„Отидовме во болница, ја прегледаа на неколку одделенија, затоа што беше удрена во главата, на лицето и на вратот. Отидовме во полиција, направен беше записник, каде ќерка ми раскажа сè што се случи, дека ја давел и не можеше воздух да земе“,
вели Бети Ангеловска, мајка на девојката.
По пријавата, осомничениот доброволно дошол во полициската станица заедно со свој родител. Но, кога полицајците им кажале дека ќе биде задржан, избегал преку прозорец. За настанот е известен и Одделот за внатрешна контрола
„При преземањето службени дејствија од страна на полициските службеници, со намера да биде лишен од слобода, лицето преку отворен прозорец избегало од просторијата за развод. Веднаш биле испратени полициски службеници и преземени се мерки и активности за негово пронаоѓање, кои продолжуваат и во моментот“,
велат од МВР.
Мајката вели дека имаат и пораки од социјалните мрежи во кои, според неа, осомничениот постојано упатувал закани кон девојката и нејзиното семејство.
„Имаме докази, цел разговор на Инстаграм е со закани. Ќе те убијам, ќе ја убијам мајка ти. Често не сакаше да оди кај него, но беше присилена. Ѝ пишуваше – ела, оти ќе те отепам, и пишуваше дека ќе ѝ става игли под ноктите“,
додава Бети Ангеловска, мајка на девојката.
Во меѓувреме, девојката е сместена во шелтер-центар по проценка на Центарот за социјални работи. На 13 ноември таа се појавила на судското рочиште, но пријавениот не дошол. Поради неуредна достава на поканата, рочиштето е презакажано за 18 ноември.
„Го молам министерот Тошковски да ја заштити ќерка ми, да не дојде да настрада како што настрадаа претходно девојките. Вакви натрапници треба да бидат затворени. Не може таа да седи во шелтер затворена, а тој на слобода. Го молам министерот за да не дојде до уште една жртва“,
вели Ангеловска.
Инаку, во полицискиот билтен од 11 ноември беше објавено дека девојката пријавила физички напад и подолготрајно малтретирање, но не беше наведено дека пријавениот избегал од полициската станица. Сега внатрешна контрола на МВР ќе утврдува дали има одговорност во постапувањето на полициските службеници.